Rimaniamo in contatto

Dialetto

Forsa Nuara tüta la vita

Published

on

L’ è da quand i son picinin che im rabati cunt al dialètt; prima par capí cus i disevan i grand e i vegg, dopu par pruá a parlal in modu e manera da fass capí. A scrival gh ha vursü un po püssè temp.
Par un bell tocch i accento sü la lettra e, la u cunt i dü puntin in scima, hinn a stai un turment.
Parchè, disumal tra da nün, al dialett l’è sempar a stai e sempar al sará una “simpatica brüta bestia” che ti sè mai finí da cunuss.
Un quai vün al disa, cun un po’ da süperbia, che al nostar dialett al riva dla visina Lumbardia e al mis-cia una quai parola piemuntesa; alura mi igh rispundi che nün nuares al minga lumbard e al parèi türinés la druvuma gnanca suta turtüra!!
Ecco, se propi duvuma truá una quai discendensa, alura son d’acordi cunt l’ avucat Giulio Carlo Genocchio, vün di püssè grand pueta nuares, quand al diseva che i rappresentuma una frangia dla civiltá ticinesa, indua al Tisin, dai muntagni dl’ Ossola, passand in mèss al Lagh Magiur, par rivà fina in Lumlina, l’è lassá una testimunianssa che suma stai bon da cultivá e rendla ünica e nostra.
Ecco, sa scapa mia!! Nün, cume ‘l nostar dialett, i suma nè lumbard nè piemuntes, i suma madumá e par furtüna Nuares.
E alura al dialett al diventa al metar par misurá quantu l’ è lunga la memoria.
Sensa la memoria as va mia luntan, e i nuares, pruincia cumpresa, gh’ hann una memoria d’elefant.
Ma dasiot dasiot anca Nuara la cambia sensa fass n’acorg e un tocch la volta la perda i só riferiment püssè impurtant: tüti cui post e cui robi che hin vist passà interi generassion.
Cume par esempi i Circul, riferiment di rion e ritrovo principal di frassion, cui che ‘dess o hin sará sü o hin cambiá la manera da véss düert.
I risturant che hin fai la storia gastronomica da Nuara cume al Caglieri e la Meridiana a Agugná sü l’ autostrá, l’usteria di Tri scalin, la Cá dl’ Emiliu a la Bicocca, al Toscano da via Dante, la Campagnola sül Curs Risurgiment, e chissá quanti altar!!!
Basta pensá a la paniscia, che tanti anni fa a Nuara gh’ era mia un böcc düert indua la cüsinavan mia, e dess cui dü o tri post indua ch’ hin bon da fala ancura, ognün la fa a la só manera, una quai vüna l’ è anca un po’ tropp fora di tradission.
Kebap e dla gran carnascia malsana, che i ciaman Hamburgher, hin pià ‘l só post.
A gh è pü gnanca la nebbia; l’è sparí cume i rundanin a primavera, cusí dess tüti i stagion in diventà vüna cume l’altra.
A resta i riséri uguali a cume i eran prima…uguali a prima vista, peró!!
Incö manca cui bistiulín che i cumpagnavan da nott al sògn cunt al só vèrs e che i diserbant in eliminá sensa lassan pü tracia. E cun lur hin sparí anca tüti cui prelibatèssi che cunt i rani cunfessiunavan di piatt da véss a stracüntá tantu eran bon:
fritá e rani, rani in ümid, rani ripieni e rani rustí…e una margherita da dü litar !!, che ti s’ eri mia cuntent fin a quand at mustrava mia ‘l cü.
Peró in mess a tüti sti ricord, che hin bon da fat gni al magón, agh n’ è vün che püssè di altar am fa bagná i öcc.
E l’è una murusa che l’è cumencià a fa perd la testa quand a Nuara la Cüpula l’era un quai ann che l’era stai finí!!
L’era al milanövcentevott quand nasseva al “NOVARA CALCIO 1908”.
E l’è ancura chí fresca e bèla ‘mè una rösa azzurra.

Nuara l’è una strà fudrà da sampietrin,
Nuara l’è un’usteria cun davanti tri scalin.

Nuara l’era nebbia e prufüm d’aria bagnà,
Nuara l’era un circul e i carti par giugà.

Nuara l’è una curt cunt i cai cun la ringhiera,
Nuara l’è un amis che ‘t cumpagna a ca la sera.

Nuara l’è una punta cun al Cristu su là in scima,
Nuara as cambia tütt, ma resta sempar cume prima.

Nuara l’è na cassina in mess a dü turent,
Nuara l’è ‘l dialett…un quai vün al capissa gnent.

Nuara l’è la ‘Lea in mess di sò bastion,
Nuara l’è speransa ma anche tradission.

Nuara l’è ‘l Monte Rosa piantá la giò sül sfund
Nuara la cumencia quand a cumencia al mund.

Nuara e San Gaudensi sará dentar al sò scürö,
Nuara ch’ la sàra la porta quand urmai hin scapá i bö.

Nuara che la rasuna però cun la sò testa…
Nuara che la parla una lengua urmai furesta.

Nuara e ‘l Camporelli e ‘l Vinticinch April,
Nuara che ‘l curagg g’ha fai imbrascià ‘l füsil.

Nuara partigiana, Nuara e la so storia,
Nuara dla liberassion, Nuara dla memoria.

Nuara l’è na rösa brinà a la matina,
Nuara una puesia che s’impara in surdina.

Nuara indua la piana a s’ingübissa un po’,
Nuara che da int l’aria la vöra mia gni giò.

Nuara a pé par tèra, Nuara calson rutt,
Nuara povra gent, Nuara bell’in biutt.

Nuara l’è un’ urchestra ch’ la suna una meludia,
Nuara al lubión dal Coccia che un erurr al perduna mia.

Nuara che una pizza la custava dusent ghei,
Nuara dal “kebap” e di cinés…ormai ghè quei..!!

Nuara di mundini par una brancà ‘d ris,
Nuara indüstrial, Nuara culur gris.

Nuara sempar svigia, Nuara risparmiusa,
Nuara facia smorta, Nuara laburiusa.

Nuara dla paniscia e dal salam dla duja,
Nuara dla casseöula che dzura al föch la buja.

Nuara dal “mulita” che ‘l rivava in bicicleta,
Nuara dal giasciarö e l giasc int la celèta.

Nuara dla grighèra da dicembar fin febbrar,
Nuara indua ‘l sul l’è mia dùls ma gnanca amar.

Nuara la cumincia ‘n tal milanövcentevott,
e drera a un balòn ‘s riva fin a l’Alcarott!!!

Nuara l’è un bell libar che ‘s legia già ‘d matina,
Nuara l’è un rigúr ch’as tira in cupertina.

Nuara l’è una maia, azzurra cunt la scüdett,
cruss bianca sü sfund russ impatacá sül pett.

Nuara la so gent…fai da povar e da sciur
la maia, la nostra maia..sempar bela cume un fiur.

Forsa Nuara tüta la vita

Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Continua a leggere
Clicca per commentare

Lascia un commento

Dialetto

Cara al mè Pédar!! …

Published

on

Ho pruvà par un mument a giügà cun la fantasia

ho pruvà a imaginà da Nuara duvé ‘ndà via.

Andà a viv da furèst int una quài cità d’Italia,

a Türín, furse Milán, Ruma, Siena, o Senigallia

 

la Mole, al Dom, al Colosseo, e a Senigallia ghè anca al mar

mah…sò mia…luntan dla cüpula son mè un can sensa ‘l culàr

si, la so, chì già a Nuembar, la nèbia as tàia cunt al curté,

e ghè anca l’ümidità che ‘t bagna dla testa fin tacà ai pé,

 

e d’ està ‘na quai šanšára, la not at lassa mia durmì

ma però la mè Nuara am piasa sempar anca cusì

sarà furse un po’ scuntrusa un po’ grisa e un po’ nuià,

ma par mi, dal mund intér, l’è la püssè bèla cità.

 

La so punta sü là ‘n tl’aria la büsga ‘l cièl cun ardimént,

l’è ‘l dit dla man dal nost Signur che ‘t mustra la strà par vés cuntént,

cula strà ch’ l’ è la to vita che l’è cumincià propi a Nuara

cume l’acqua in fund d’un puss ch’ la smea scüra ma pö l’ è ciàra

 

cume ‘na rösa pena düèrta bagnà dla brina a la matina,

cume un fiùlin che slarga i öcc davanti ai giöch d’una vedrina,

cume un rundòn che’ l turna sempar indua ‘l nid l’è fai l’ann prima,

mè ‘na muntagna ch’ la smea biuta sensa la fiòca sü la scima,

 

cume l’azzurro, ch’ l’ è ‘l nost culúr, e da nòt al lüsa mè ‘na stèla,

mè ‘na cüntula davanti ‘l föch, quand fora a piova e agh và l’umbrèla,

mè la pèl d’oca ch’ at vegna indoss a sentí ‘l nom dal stadio vécc,

cume quand a ghè tempesta e ti ‘t ripari suta un técc,

 

cume ‘na prösa da magiustri ch’ la veda rivà una dacquadùra,

cume la nostra maja azzurra che numà ‘l südur l’ unúra,

cume un pensier che cume un ciòd s’impianta fiss in testa,

mè una puesia in dialèt ch’ am disa : “la to cità l’è questa!!!!”

 

e dò paroli, car al mè Pédar, e chì i tiri in ball al Presidént,

ch’ al pensa un po’ a la povra gént che par fa l’abunamént,

as tira via al pan d’ in buca par cula maja inssì bèla e vera

che a la fin da sta ‘ventüra ricordal bén ti duarè ridàla indréra.

 

Nonnopipo 

Continua a leggere

Dialetto

… e dopu al Nuara i Spinasc!

Published

on

I gh’ avevi si e no vott o növ ani,

che ‘l mé ziu, brancà sü la bicicleta,

insema al Tigliu, al Bertu e al Bursàn,

as partiva tüti insema dla piassèta

 

mì sètà sü la cana, ‘na biciclèta sgangherà

par andà a véd al Nuara as cumincia a pedalà

 

 Via Verbano tüt d’un fià, as pudeva mia fà tardi,

as dueva fà una sosta propi al circul Leonardi

 

quatar bicér e un po’ da grapa sgardiunà in pé al bancòn

un lèca lèca e una spümin l’era la mé cunsümassion

 

e par mia fà d’ intort arivà sül largh Buscaglia

un’ altra sosta al Matteotti e cusí nissün sa sbaglia

 

al Bursàn as na n’ acorgia: “fiöi cumincia la partida!!”

via da cursa all’Alcarotti rivà in temp l’era una sfida.

 

da luntàn as senta i vuss suma ancù rivà in ritard!!,

vün al vusa e as senta ben: “arbitro ti sé un gran bastard”

 

“Dai anduma fasuma in prèssa dam tre cürvi par piasé!!

al fiulìn al paga mia, l’è poch püssè che un magaté!!”

 

al Bertu e ‘l Tigliu i rampìgan sü cui ass da legn bagnà

mi al mè ziu e ‘l Bursan i suma dré la raminà

 

propi quand, porca la logia, al Nuara al ciapa un gol

e al Tato un aversári a la ciapa par al col

 

sü la cürva l’è ‘na ribulgia ghè pericul d’invasión

quand al Ricu cun un tiràsc, ‘nt la ret l’ infila al balón

 

forsa Nuara! forsa Ricu!! sta sü in pé va mia par tèra!!

se na fasuma ancura vün i vinciuma anca sta guèra.

 

Adess al Ricu la bala ‘nti pé al cura dricc par scriv la storia,

na salta vün … na salta dü ma ‘l tèrs a la ransa mè ‘na siloria

 

Stramassa al Ricu, la facia ‘nt la fanga, l ‘è par tèra cun unúr,

intant al “bastard e disunest” l’è sübià e ‘gh dà ‘l rigur

 

Salta in pé tüt l’Alcarotti e ‘l President, al Sciur Santin

al cura vers al Ricu Bramati e sü la frunt agh dá un basìn

 

sül dischèt al va al Giannini … eleganssa e sentiment

tüt la stadio al vusa “goool” l’è la fin d’un gran turment

 

La partida la finissa e dü a vün l’è ‘l risültà,

però adèss in biciclèta dasi dasi as turna a cà

 

Alura al Tigliu infurma i altar, che prima da turnà indré,

se is fermuma mia a la Crava da duman al cambia misté.

 

Par la granda caritá füssa mai sta roba brüta!

urdinuma una margherita e la spassuma fora tüta.

 

i hin vot’ uri, però dla sera … piantumla lí da fa i paiàsc,

e ‘l Bursan ‘l fá una pruposta :”nduma a scena ’n di Spinàsc!!”

 

“Noooo!! la dona pö am vusa, vürarissi mia rüsá!!

pö g’ ho dré al mé nivud, i la devi purtà a cà”

 

“Dai ziu Mario it la prumèti che it farò mia tribülà,

al Nuara l’é vinciü sü dai anduma a festegià!!

 

Forsa Nuara tüta la vita

 

Nonnopipo

Continua a leggere

Dialetto

E anca stavolta l’è ‘rivà al derby

Published

on

Sarà che passa ‘l temp, sarà che son dré gni vécc, sarà chi n’ ho visti a sè, sarà che gh ho pü voia da fa la guèra a nissün, e fa la guèra l’è mai bèl, gnanca par giöch.

Sarà parchè la puntisèla tra mi e i àltar urmai la lassi giò sensa pü tirala sü: ch’ a riva un po’ chi l’è che gh ha voia da rivà, che tant g’ ho pü paüra da fam mal.

Sarà che urmai son cunsümà ‘mè un arlabach, o ch’ i son drera ingimbàm ‘mè ‘na pèrga dla bügà, ma son pü bon da capí sta rivalitá cun Varsé.

Un cünt l’è la balada, piàss in gir fin a mandàs da via ‘l cü (ho dì mandàs eh, mia mandài!!), altra roba inveci l’è dì o scriv robi dal tipu ” massumai tüti “ o “asfaltumai”, cume se i füssi al padron d’una impresa ch’ l’asfalta i strai.

E pö suma unèst e disuma la verità: sia a Nuara che a Versé i gh avuma dò squadreti che is la passan mia trop ben … forsi nüm giüst un cicinin püssè mia ben da lur.

Cunfèssi che una volta la pensavi int un’ altra manéra sensa tanti vèrs, ma ‘dèss, par i rasòn che son spiegà cinq o ses righi chi dzura i pudarji udià nissüna, e quand i disi nissüna i cumprendi anca cui da Versé; magari sensa véss par forsa grand amisòn.

Si, propi i tifus dla Pro Vercelli; che gh han una roba meravigliusa che spartuma insèma: lur i fann al tifo par la squadra dla sò cità, propi cume nün da Nuara, e da sti temp vissià e scarùss l’è ‘na roba tantu rara e da difend cunt i ungi par dò cità da pruvincia cume i nostri, anca se, sia nüm che lur, i suma pü cui da prima e i suma pruvà süla nostra pèl cusa vöra dì pagà al dazzi d’un faliment.

Da dla dal Sesia i fann al tifo par Sant Eusebi, da chì dl’ Agogna par San Gavdensi che ‘s rivulgeva al Vescuv da Versé ciamandal “Magister”. Lur i rüsavan mia par véss vün püssè impurtant a-dl’ altar, i gh avevan mia al bun temp, ma di bèli gati da plà, lur i eran amis e püssè fürb da nün che inveci suma bon da rüsà par un balòn.

E dismentigumas mai che fin un quai ann fa i suma spartì la muntagna püssè bèla dal mund: al Monte Rosa; Alagna d’una part e Macügnaga dl’ altra, pö hin rivá cui dal Lagh Magiùr e dl’ Ossola e cui da Bièla e hin rabaiá sü cul che i pudevan e ciau merlu!

Par indulsìs lur i mangian i biciulan, nün i biscutìn, che tüti e dü hin sfamà la gent, propi cume la paniscia e la panissa che hin nassü tüti e dò dla puvertà di cassini e dèss is permetuma da fa i sufistich: “l’è püssè buna custa, l’è püssè buna cul’ altra” sensa nacorgias che i suma propi tüti quanti di gratacü, nuares e versles: se ‘t piasa vüna at deva piasé par forsa anca l’altra, cüntumas mia di bali eh!!

Lur i gh hann al Gatinara e nün al Ghèmm…se propi propi  i vurì mia bev al vin di altar purtimal a mi che da diferensi na fo mia da sicür.

La Basilica da Sant Andrea, che l’è cunsiderà vün di prim munument gotich d’Italia e la cüpula da San Gavdensi che gh ha mia da bisogn da véss decantà tantu l’è bèla e la cumencia a rampigà vèrs al cel parténd da dzura la sò Basilica, e se ti sè bon da rivà fin in scima ti pudarè véd madumà di gran risèri, risèri tüt in gir, da chì cume da d’ là, sensa la püssè picula diferensa, cusì par casu o par rasòn.

Furse chi l’è scernü o surtegià cume spartì tüta sta roba, a l’ha fai sensa fa d’ingann.

Suma nün che i gh avuma al bun temp e suma diventà tantu tantu smorbi.

I ma scüsi se un quai vün da vüaltar al farà fadiga a légg al dialèt da Nuara, ma l’è una manéra par sentìm püssè visìn a la mè cità, e da cunsguenssa anca a la mè Maja.

Forsa Nuara tüta la vita.

Bun derby a tüti.

Nonnopipo

Continua a leggere

NSN on Facebook

Facebook Pagelike Widget

Telegram

Ultimi Articoli

Copyright © 2017 Zox News Theme. Theme by MVP Themes, powered by WordPress.