Vöri scrif una bèla cuntula par al nostar Diretur

da purtas drèra al mercà quand al cumpra i giügadùr

l’avrà marcà cus l’è ch’a serva par mia fa la fin dal lifròch

basta légg i indicassiòn e ti sè già avanti d’un bèl toch.

Al purtiér l’è l’ünich ruolo che ’nt al temp l’è mai cambià,

giò la in fund tüt d’im-par-lü al pensà madumà a parà

I difensur in mèss a l’area dess i a ciaman “i centrali”

una volta “liber e stopper” sensa cacià insì tanti bali

Dü tersin vegia manera e un median che al magnulava

cume al Rocca da Castrovillari che i aversari i a impicava

Un’ala svigia a saltà l’oman cume al faseva al Gavinèl

sü la destra l’era una schegia e a guardal l’era fin bèl

Pò agh vöra un ragiunàt, fursi un geometra però l’è méj

vün ch’al giöga tanti balón quant’in testa agh n’ha ‘d cavéji

Sü!! truvuma un “triquartista” vün da cui cunt i pé bon

cume al Lüisìn Giannini che süi pé at meteva al balòn

dess a manca chi ‘l fa i gol, un lipagiòn bèl grand e gross

vün che tüti i difensur, manumà a pensàgh is cagan doss

vün cun al cör dal Pinamonte generùs ‘mè una dacquadura

Fabio Enzo, Jacomuzzi, al Ricu Bramati e tanti àltar ancura

Una panchina digurdì cun tri o quatar giuvnutèl

una brancà da “senatur” da spedì in camp sül püssè bèl

‘dèss parluma dal padròn, cul Giügastròn d’ un milanés

ch al venda püra a chi ch’ al vöra magari anca a un giargianés

ma ch’as la cacia ben in testa e ch’as na faga una rasòn

che s’ al fa ‘na quai vacàda igh curùma dré cunt al furcòn

Già ch’ i son dré a scriv tre rimi, senssa pretesi e senssa boria

végnan in mént i tri delinquent ch’ i hin scrivü la fin dla nostra storia

i riporti mia i so tri nom parchè im fan gni vojia da tra sü

i preghi però al Giügastròn da fa che sta storia as ripéta pü

e “giügastròn”, car al mè Ferranti, l’è una una dulsa definission

riservà cun simpatia a chi par giügà l’è purtà drera al balòn

Un pensér cun tanta speranssa e un augüri a l’ alenadùr

avégal chì sü la nostra panca sti tranquil l’é un grand unùr

‘Dèss tiri via al distürb e i cùri a fa anca st’ ann l’abunament

sperand che l’”emiro” Altamimi am farà mia ciapà un quai spuvént.

Nonnopipo

… e se i giocatori se la facessero tradurre chissà quante cose capirebbero!!

‘N tla mè testa gh’è la nebbia o l’è la mè immaginassion?

fora ‘l temp al passa sveltu e ‘s tira dréra anca i stagion

son setà sui mè scalin in mèss dla gent tanti ani fa …

im guardi in gir … chi l’è chi si??? … i son fina stracüntà!!!

i a guardi ben e dèss ma smea … si ma smea da cunuss

se propi propi mia la facia … fursi almenu una quai vus

ma si! l’è propi lü al vusava sempar mè ‘na strascé,

al bestemiava tacà l’arbitro e cun i pugn s’alsava in pé

oh Signur!!! mè l’è cambià!! l’è diventá insí tantu végg?

però … a guardà ben … un quai vün al sta anca pégg

‘dess im giri e guardi indrè, cun i öcc i rivi fin là int l’aria

vardal lí cul brav umett cun la ghigna un po’ bunaria …

l’ era giuvin … sui trent’ani quand andava a l’Alcarott

ma in tra cula i settant’ani in rivà in cinch e tri vott!!!

In cul grüppètt in pé a destra ghè in mèss un bèl fiulín

si…adess im na n’accorgi … i son mi da picinin

al mè siu Mario al mè pà Gino al Gügia al Lisca al Culunèl

tüti là in mèss d’la cürva e ‘l sògn l’è ancura püssè bèl

cul pruverbi al disa che … se ti ghè i cavéj russ

che ‘l to pa o prima o dopu ti la sbati gió ‘n tal puss

par furtüna l’è mia vera e cul fiulòtt ch’ l’ è lì setà

as capissa dai cavéi russ che visin al gh ha só pà

ghè ben tri generassion a scaldàs al cör par al Nuara

nonu, pà fin ai nivùd che da vusà i fan la gara

dl’ Alcarotti as riva al Piola int un viàg dentar la storia

e pö ‘s passa da travèrs sempar sül fil  dla memoria

cunt al cör che ‘l pica fort quand al veda sti culúr

al fa viscà la lampadina alimentà dal nostr’amúr

dés vint trenta cinquant’ani int un fià hin passà via …

chi l’è viv e chi gh’ l’è pü chi ‘l büta giò una puesia …

im disvégi un po’ camüff  cunt al sógn ch’ al viunda in testa

la mè Maja la nostra Maja mai nissün pü la calpesta …

… e una roba l’ è sicüra sensa tèma da sbaglià …

al nost amur par al Nuara al dürerà un’eternità.

Forsa Nuara tüta la vita

Nonnopipo

Quand im trovi al Piola, che l’è la mè secunda ca, e senti parlà al dialèt, istintivament im volti a la ricerca da chi, in cul precis mument, l’è dré parlal.

Un po’ cume quand tit trovi luntan da Nuara, o adiritüra a l’estero, e at capita da sentì cula lengua cusì particular.

Ti vurarji sübit identificà al “pruprietari” da sta parlada, füssa mia d’ altar par ribadigh, urgugliusament la stessa pruveniensa e la cundivision sulidal dl’ identich idioma.

Parchè nüm, che i parluma al dialèt, i suma sicürament da Nuara, o quantumenu i n’ uma respirà l’aria fin da fiulìn.

Ti sculti cula parlada cusì particular, che g’ ha mai schiscià l’öcc a la réal Türin, e l’è luntanissima par cadensi e armunii a la püssè renta a nüm Milan, che sübit la ment la va a verificà se l’esista una quai cunuscensa cunt al tipu che ti gh è d’innai, süperand int un santi e amen tüti cui inütil cunvenevul.

Suma da Nuara, a basta cul, l’è una carta d’identità a pèl, ansi, a lengua, una testimuniansa a cel düèrt, e l’è sè cusì.

E sübit ti entri in sintunia cun ‘sta persuna, purtatur san da nuaresità, ambasciatur storich e cultüral e, ‘diritüra, Ministar di esteri dla to cità. Chissà se i Sindich che i hin guvernà Nuara eran, o i hin bon da parlà al dialèt? Da vün son sicür, l’era al Lisandar Bermani, che l’è scrivü di puesii che quand ti a légi it fan gni sü la pèl d’oca!!

Inveci al Sciur Nissün che ti ghè davanti al parla un dialèt cun la certificassion da madre lengua nuaresa.

Ma gh è un particular, che püssè da qualsiasi altra cundivision teriturial, e püssè da qualsiasi legàm pulitich, agh i identifica cume citadin dla santa madre patria nuaresa, as manifesta quand ti vegni a savé che al fradèl che ti gh è davanti l’è, anca lü, un tifus dal Nuara Calcio 1908: 1908 parchè nüm i s’evan mai falì, fin a quand una brüta rassa da manigold, nissün da Nuara, l’è pensà ben da fa sciüstrina di nostar sentiment e dla nostra storia. I cinés i disan da sétat sü la riva dal fiüm e spétà cun passiensa che, prima o pö, al cadavar dal to nemìs al passa. E cusì, par furtüna e giüstissia, ho legiü sta matina prestu, che la Guardia da Finansa gh ha pensà lé a dagh la pussibilità a l’ültim rivà da sta quadrascia da vigliacòn, d’ avegh tantu temp a dispusission pa imparà a légg e parlà al nuares, sbatandal in galéra. Che bèla nutissia, anca se, a dì ‘l vér, i provi un sentiment da tristèssa mis-cià a rabbia.  

Ma lassuma pèrd sta brüta storia e turnuma al nostar amìs, che cume tì al ricorda al prufüm di ass da legn bagnà dla cürva dal mercà, che d’ invernu i giasciavan, e suta al prim sul dla primavera, i rinsecchivan fin al punto da büsgat al cü suta furma da schégia. Tai lì i dü nuares d’una certa età che in mèss d’ una strà i ricordan i giügadur che i hin fai part dla vita da tüti e dü, ben sètt sü vündas i eran nuares!!, al Tato Lena, al Canto, Mascheroni, al Lüisin Giannini, al Renatino Gavinelli supranuminà la freccia da Catignaga, al Testa Celestino da Cameri e cul che ancura incö l’è cunsiderà la bandiera dal Nuara, profugo dl’ Istria, ma nuares a tuti i efètt: al grand Nini Udovicich. 

E cusì, cun un ricord dréra l’altar, i finissan par pruvà cumussion quand as va a finì a parlà dal President da cul Nuara, al geometra Santino, si, Santin e bom, parchè vün da famiglia ti la ciami mia par cugnom.

Is lassan dopu un po’, cinq, dés minut, forsi un’ura ‘bundanta, ma gh ha mia impurtansa. I s’ han mia scambià al numar dal telefono e gnanca i nom … l’è bastà sentì girà par aria una quai parola in dialet nuares par demulì qualsiasi mür, qualsiasi barriera: in fund a basta poch quand l’è tantu cul che ti gh è in man e int al cör. L’è stai sè truvas e cunussas luntan da Nuara par ricurdà l’Alcarotti e cui ass bagnà cunt una quai a-scheggia che ta spungeva la pèl dal cü.

‘Dèss al Piola l’ è tüt fudrà da pultruncini che mì i cuntinui a ciamà scagnìn, e al dialèt l’è sempar püssè rar sentil parlà, testimuniansa sincera che al témp al passa e i tradission is trasfurman in ricord, ma una speransa am piasarissa cultivà cun tenerèssa: che un dumàn, tra tantu temp, al nostar President dal Nuara “Fulbar Clab” la ciamaruma madumà cunt al sò nom, Massimo, cusì cume i ciamavan Santìn cul che l’è stai al mè President.

L’è l’augüri püssè sincer che igh podi fa.

E dopu che i dü nuares i s’ han salüdà e i hin andai ognün par la so strà, al durs dla man al va a sügà l’ümid di öcc, intrament che al cör e l’anima i süssüran cun infinì amur: “forsa Nuara tüta la vita”.

Nonnopipo