Rimaniamo in contatto

Dialetto

Ferranti Massimo? No, l’è sè Massimo … e bom!!

Published

on

Quand im trovi al Piola, che l’è la mè secunda ca, e senti parlà al dialèt, istintivament im volti a la ricerca da chi, in cul precis mument, l’è dré parlal.

Un po’ cume quand tit trovi luntan da Nuara, o adiritüra a l’estero, e at capita da sentì cula lengua cusì particular.

Ti vurarij imediatament identificà al “pruprietari” da sta parlada, füssa mia d’ altar par ribadigh, urgugliusament la stessa pruveniensa e la cundivision sulidal dl’ identich idioma.

Parchè nüm, che i parluma al dialèt, i suma sicürament da Nuara, o quantumenu i n’ uma respirà l’aria fin da fiulìn.

Ti sculti cula parlada cusì particular, che g’ ha mai schiscià l’öcc a la réal Türin, e l’è luntanissima par cadensi e armunii a la püssè renta a nüm Milan, che sübit la ment la va a verificà se l’esista una quai cunuscensa cunt al tipu che ti gh è d’innai, süperand int un santi e amen tüti cui apicicus cunvenevul.

Suma da Nuara, a basta cul, l’è una carta d’identità a pèll, ansi, a lengua, una testimuniansa a cel düèrt, e l’è sè cusì.

E sübit ti entri in sintunia cun sta persuna, purtatur san da nuaresità, ambasciatur storich e cultüral e, ‘diritüra, Ministar di esteri dla to cità. Chissà se i Sindich che i hin guvernà Nuara eran, o i hin bon da parlà al dialèt? Da vün son sicür, l’era al Lisandar Bermani, che l’è scrivü di puesii che quand ti a légi it fan gni sü la pèl d’oca!!

Inveci al Sciur Nissüna che ti ghè davanti al parla un dialèt cun la certificassion da madre lengua nuaresa.

Ma gh è un particular, che püssè da qualsiasi altra cundivision teriturial, e püssè da qualsiasi legàm pulitich, agh i identifica cume citadin dla santa madre patria nuaresa, as manifesta quand ti vegni a savé che al fradèl che ti gh è davanti l’è, anca lü, un tifus dal Nuara Calcio 1908 (1908 parchè nüm i s’evan mai falì, fin a quand una brüta rassa da manigold, nissün da Nuara, l’è pensà ben da fa sciüstrina di nostar sentiment e dla nostra storia).

E cume tì al ricorda al prufüm di ass da legn bagnà dla cürva dal mercà, che d’ invernu i giasciavan, e suta al prim sul dl aprimavera, i rinsecchivan fin al punto da büsgat al cü suta furma da schegia. Tai lì i dü nuares d’una certa età che in mèss d’ una strà i ricordan i giügadur che i hin fai part dla vita da tüti e dü, ben sètt sü vündas i eran nuares!!, al Tato Lena, al Canto, Mascheroni, al Lüisin Giannini, al Renatino Gavinelli supranuminà la freccia da Catignaga, al Testa Celestino da Cameri e cul che ancura incö l’è cunsiderà la bandiera dal Nuara, profugo dl’ Istria, ma nuares a tuti i efètt: al grand Nini Udovicich. 

E cusì, cun un ricord dréra l’altar, i finissan par pruvà cumussion quand as va a finì a parlà dal President da cul Nuara, al geometra Santino, si, Santin e bom, parchè vün da famiglia ti la ciami mia par cugnom.

Is lassan dopu un po’, cinq, dés minut, forsi un’ura ‘bundanta, ma g ha mia impurtansa. I s’ han mia scambià al numar dal telefono e gnanca i nom … l’è bastà sentì girà par aria una quai parola in dialet nuares par demulì qualsiasi mür, qualsiasi barriera: in fund a basta poch quand l’è tantu cul che ti gh è in man e int al cör. L’è stai sè truvas e cunussas luntan da Nuara par ricurdà l’Alcarotti e cui ass bagnà cunt una quai a-scheggia che ta spungeva la pèl dal cü.

‘Dèss al Piola l’ è tüt fudrà da pultruncini che mì i cuntinui a ciamà scagnìn, e al dialèt l’è sempar püssè rar sentil parlà, testimuniansa sincera che al témp al passa e i tradission is trasfurman in ricord, ma una speransa am piasarissa cultivà cun tenerèssa: che un dumàn, tra tantu temp, al nostar President dal Nuara “Fulbar Clab” la ciamaruma madumà cunt al sò nom, Massimo, cusì cume i ciamavan Santìn cul che l’è stai al mè President.

L’è l’augüri püssè sincer che igh podi fa.

E dopu che i dü nuares i s’ han salüdà e i hin andai ognün par la so strà, al durs dla man al va a sügà l’ümid di öcc, intrament che al cör e l’anima i süssüran cun infinì amur “forsa Nuara tüta la vita”.

Nonnopipo 

Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Continua a leggere
Clicca per commentare

Lascia un commento

Dialetto

I pagèli dl’influensa e dla sciatica

Published

on

I pagèli cun l’influensa e la sciatica grassie a SportItalia

 

Raspa  

Am da una man fasend un’ uscita che püssè gnuranta d’ insì as mora. Pö as riscata cun un’altra da inteligentòn

Bonaccorsi

L’ intervent püssè dificil a la fa quand da lateral al passa in mèss a sustitüì Benassi infurtünà.

Benassi

L’ intervent püssè dificil a la fa quand da central al passa in panchina quand l’è infurtünà

Agostinone

Anca se al g’ ha la grassia e la delicatessa d’una mietitrebbia, la so presensa in camp l’è indispensabila ‘mè al green pass par entrà int l’usteria

Paglino

Al so dirèt aversari l’ han purtà via cun l’ambulansa intrament che al vusava <Purtim via, luntan da cul lì cunt al trentadü sü la schena, i la vöri pü s-ciarà gnanca in cartulina>

Vaccari

Dopu la partida l’è ciapà al cestin dla merenda e g’ ha bütà dentar al gol. stasera cume premi g’ ha al permèss d’ andà a durmì a dés e mèsa che duman as deva andà a scola

Tentoni

Al giöga una partida da premi Nobel e cul recupero dla bala al vutantanövesim che al manda in gol al canibal Dardan, al merita l’espusission int la Galeria di Uffizi a Firense

Di Masi

Se al segna mia, almenu un assist da gol la fa sempar. Al tira al carèt cume al mülu dal Sciur Cichìn, e prima o pö un po’ da ripos a la merita.

Laaribi

Al merita un bèl vut in pagèla, sia parchè l’è stai bon da fa un fallo a giögh fèrmu, sia par la  petinadüra che la cataluga cume ambasciatur dl’ ignuransa cume agh piasa a nüm. Se pö i pensuma che Dardagnan al pretenda la so amunission quand agh va doss ris-ciand l’infurtüni, al diventa un idolo.

Vuthaj

Cun la so facina da sicàri dla mafia giapunesa, al sumena al terur in mèss dla difesa aversaria. Incö l’è penetrà in area püssè da quantu Selèn l’è stai penetrà in tüta la so carriera.

Gonzalez

Cume premi par la buna prestassion cuntra al Casal, la sucietà g’ ha cuncès al lündas da libertà

par andà a véd i cantier

 

Sustitüssion

Amoabeng   I prim dü passag i hin sbaglià, e cume al pulissa la bala cun la majèta prima da bat al fallo lateral a significa che l’è sü la stra buna par diventà vün di gnürant che i preferuma

Bortoletti  Al lavur püssè dur l’è infilà la fassa da capitàn

Capone  Al sustitüissa Paglino e al reclama parchè da cula part al trova al camp giüstà cume se a füssa passà la siloria.

Brucoli – Scariano  Benvegnü

Marchionni  I dü esterni dal centrucamp i fan un lavur dla Madona e i rüscan sensa alsà la testa. Buna l’idea dal Mister, cume cula da uffrìgh sübit un cuntrat par fa i pulissji a cà sua dò uri al dì, méi dopu l’alenament cusì i pulissan anca la docia.

Nonnopipo 

Continua a leggere

Dialetto

La paniscia … azzurra

Published

on

Tutti gli anni, con l’arrivo del primo freddo, quando la brina rende croccanti le verze, ho il piacere di riproporre queste rime.
La vegna ndi cassini e l’è un piatt dla povra gent,
l’è ‘l ricord d’una vita grama quand sül tavul gh’ era gnent.
E quand la nebbia, vèrs Nuembar, l’era grisa ‘mè la fam,
e un purscé, che tacá sü as trasfurmava in salam,
as capiva a la sveltina e sensa tèma da sbaglià,
che al temp da fa la paniscia finalment l’era rivá.
‘S cuminciava tri dí prima cun la versa giá brinà,
‘s bütava dentar i fasö, un po’ intér un po’ schiscià,
‘s faseva búi un po’ da cuji, un toch d’oss bel divussius,
e al brod, dasiot dasiot, al cuminciava a gni mustùs.
Un para d’uri i bastavan mia, agh na vüreva cinq o sés,
e se gh’ era mia temp…as saràva un öcc….va ben l’istéss!
Pö ‘s ciapava un bel cudrö che s’ üsava fai da ram,
e ‘s tirava fó dla duja ‘na fidighina e un bel salam.
Sül tajér* as pistava al lard e fina ‘s triava ‘na carota,
un po’ ‘d sèlar, una scigula fin a quand ‘l cüdrö a scota,
Quand al büter a sfrigulava e al ris l’ era ben tustá,
s’ argiungeva ‘na buta ‘d Spana a föch alégar par sügá.
Pö l’era ura, finalment, da purtá a cutüra al ris,
sensa prèssa cun passiensa par mia fà di gran pastís.
Un quart d’ ura…vint minüt, trusá ben e cun curagg!
manca dess numà una roba: una gratada da furmagg!
Pö un tocch da cul bütér che ‘l fadiga a slenguà,
as trusava ben……sensa paüra, pö ‘s lassava ripusà.
Un öcc al tavul…l’è tüt a post…anca al vin al manca mia,
e ‘s mangiava la paniscia che a Nuara l’è puesia!
Uramai l’è un bott e mèss e a l’Alcarott giöga ‘l Nuara,
‘s branca in man la biciclèta a chi riva prima ‘s fa la gara,
Sará ‘l vin in abundansa e tri piatt da cul risòt
che sü i ass da legn dla cürva as finiva a fà a cassót.
Tüti bulà ‘mè i pumcudógn e sgarblà ‘mè ‘na saràca,
ma da vusà “forsa Nuara” la nostra vus l’ era mai straca
* licenza poetica
esatto sarebbe “pistalard”
Nonnopipo

Continua a leggere

Dialetto

I pagèli dla partida vista in television

Published

on

Stavolta ho tacà la mè vègia television che in bianch e négar l’è trasmetü la partida da Sanremo. Par un mument i g’ho avü paüra quand al teleradiocrunista l’è ciamà i giügadur dla Sanremese, “Matuziani”. Ho pensà: < Cramentu, ho sbaglià a sintunišà la mè Radiomarelli TV, am tuca risintunišala par vedè al Nuara. Pö, cun la lenta d’ingrandiment, ho légiü i nom di giügadur süi majièti e m’ ho tranquilisà> 

Raspa  La parada püssè spetacular  l’ ha fai int al prim temp quand l’è cambià sport e lè tirà un cassot da ko al balòn. 

Vimercati. A metà dal secund temp al salüda tüti e al va al teatar Ariston a fa un pruvìn. Par cume l’è giügà incö igh augüri una lunga carriera.

Bonaccorsi  L’ è fai una triena da salvatagg che finì la partida i g’ han uffrì sübit un post da bagnìn par la stagion estiva.

Benassi. As trova in mèss dla difesa cume se al füssa in tangensial int l’ura da punta: fermu in culòna

Agostinone  fin a quand l’è stai in camp l’è stai cume la trama d’un film porno: inesistenta.

Di Masi. L’è giügà tüta la partida cun indoss la toniga dal predicatur int al desèrt. Tanta vuluntà e al gol i hin mia stai sè par purtà a cà la ghirba.   

Capano I ünichi bali ch’ al tuca i hin i sui suta la docia. 

Culi pochi volti che al giöga un quai balòn a smea che agh fa püssè schivi che a Malgioglio la gnocca.

Gonzalez  Par cume l’è giügà incö am vegna la voia da finì al cugnom cun la s al post dla z, che mi i la so a la fa gni rabbient. Int al secund temp l’è fai un tir che secund i calcul dla NASA al duvria tucà tèra int al 2027.

Vuthaj. Sempar precis al timbra al cartlìn cume i uperari dla Fiat e anca stavolta al sarcòla al butarö.

Spina  <Spina l’è mia bon !!> <Ma cume al fa a giügà cul li int al Nuara!!??> < Tirìl fora par la gran carità!!> … Intant l’e già al tèrs cross che as trasfurma in gol.

Tentoni. Al cura, as dana l’anima, s’ impegna cume pochi, pécà che pö dopu al riscaldament al finissa e cumincia la partida.

Laaribi  Fin a d’ura l’ avrà giügà si e no una trentena da minüt e l’ è tentà da fa una vintena da culp da tach sensa imbrucàn vün. Al deva cambià i scarpi cun i tach a spillo e mèt i scarpìn ciudà cume i fan tüti.

Bortoletti. Lè ciapà un paltraversa sensa gnanca nicòrgias

Capone –  Amoabeng  Da quand i hin entrà lur, la partida l’è ‘ndai propi cume prima.      

Marchionni. Al veda giügà la squadra cume se la fussa alenà da Gianpaolo, Di Francesco e Boscaglia tüti e tri insèma. Al pretenda che i difensur i inissian l’assion da dréra, sensa rendas cünt che i manovran mia una “cinqcent” ma una rüspa. Al prim e al secund gol i hin nassü propi par ‘sta rasòn.

Nonnopipo    

Continua a leggere

Telegram

Facebook

Ultimi Articoli

Copyright © 2017 Zox News Theme. Theme by MVP Themes, powered by WordPress.

%d blogger hanno fatto clic su Mi Piace per questo: