Augüri da bun Nadal … ma mia a tüti! Dialetto

Suta un ciel ch’al sa da guèra da rassismo e suferensa

fasuma l’albero pö ‘l presepi in mèss un mar d’ indifferensa

 

sfularmà mè i can da cacia quand i nasan ben l’udùr

a ghè nissüna diferensa tra la belva e ‘l dumatùr

 

tüti dentar la stessa gabbia a lutà par la supravivensa

sempar prunt a girà la facia e spügà una quai sentensa

 

Purtuma indoss i stèss vistì cüsì cun al fil dl’ ignuransa

pö cercuma i fassulètt quand as piangia in abundansa

 

Però ‘dess a ghè ‘l Nadal e i suma tüti püssè bon,

e cul che püssè interessa l’è mangià mè di gurdiòn.

 

Tanti augüri a lü e famiglia, ch’ am salüda la so sciura!!!”

si, l’è cul ch’ al sta al quint pian, e la so dona l’è impustura

 

Quantu temp che it vedi mia, son cuntent da brasciàt sü “

A m’ha sempar stai süi bali, ma ch’al vaga a da via ‘l cü!!-

 

Suma fals ‘mè na banconota dal valur da quindas euro,

e la sciarvèla in cunfüsión da ricuverala in neuro!!

 

I püssè timurús da Diu i vann a messa a mesanott,

ma pena fora dl’ üss dla gésa is ricordan pü na gott.

 

Pö van ca, pìcan la dona, una scarpá ‘n tal cü ai fiulín,

e cun la facia suridenta i düerdan i pachetìn.

 

Si la só ho fai una menda, “na got” la disan i milanes,

ma sant’ Ambrös che l’era Vescuv l’era amis di nuares!!

 

Ma adèss l’è temp d’augüri, manca poch a la scadensa,

se im dismentighi un quai vün i pagaró la penitensa.

 

Bun Nadal a tütt al mund, bon Nadal al mè Nuara,

bun Nadal a cula maia che par nün l’è tantu cara.

 

Bun Nadal a l’ Alcarotti, grüpp da storia e sentimént

bun Nadal ai mè amìs sensa da lur sarissi gnént

 

Bun Nadal Mister Banchieri galantom da prufession

ciapa in man una bèla vis-cia e fa trutà sti lasaron

 

Bun Nadal ai dipendent da cul padron ch’ al paga mia

sti tranquil e sti quaièt che prima o pö i a caciuma via

 

… ma una vuss putenta e forta sensa tropi resistensi

sü dla panscia la rampega fin rivá a scavá i cusciensi …

 

… e se ti sforsi un po’ l’urègia sensa avegh tropi pretest,

ti sentirè vusá ‘l Carlon … “dirigent bastard e disunest”!!

 

Brüt Nadal a sta gentàia che l’è dré a rubam un sogn

dla brüta rassa ‘mè vüaltar igh n’ uma mia da bisogn

 

I si rivà cun i pruclama e i si massà tüti cume in guèra

buriùs gnürant e incumpetent da finì suta una mutèra

 

Sarìf sübén in cula gabbia da duva vunc i si scapà

che Nuara e la sò squadra i saràn mai la vostra cà

 

Brüt Nadal a sta rümenta, giargianes sensa vargogna

turnì d’ ‘induva i sì rivà turnì a ca vostra int una fogna

 

Ma prima che a mèsanot al vegna al mund al Bambín Gesü

dim indréra la mè majia e andì a impicav e a da via ‘l cü

 

E ‘dèss chi suma tucà ‘l fund i alsi i öcc e guardi indréra,

bun Nadal a “Novara siamo noi” e finissi chí sta tiritéra.

 

Forsa Nuara tüta la vita

 

Nonnopipo


Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Lascia un commento

%d blogger hanno fatto clic su Mi Piace per questo: