Quanti erur int la mè vita, stüpidadi da giuventü,
quanti erur sensa n’ acorgiam par dí dopu “la fó pü”

Ma sa sbaglia anca da grand, cun sü i spali l’esperiensa
quand dal temp par rimediá ti pudrissi restá sensa

Son padron d’un gran negossi duva as venda l’incertèssa
ben in vista sü ‘na scaffal propi in fianch l’ insicüressa

e li rénta ghè un muntón da speransi sbatá via
i a sistemi int i tirètt…’tant da sògn urmai ‘gh nè mia

Peró ‘dèss, a pensagh ben sbati mia tütt int al foss!!
i ricord, cui püssè car, i mi a cüsi ben indoss…

… la famiglia, tüti i mè amiss, la mè infansia e l’alegria
son sicür da mia sbagliam, mai nissün ‘m i a porta via

Ma … cus l’ è ca spunta fora … là par tèra in cul cantòn?
l’ è un sachètt tütt impulvrá tütt fai sü int un fugnón…

… i ma sbassi … fó gió la puvra … un bufón…la vula via …
… la düèrdi dasi dasi … ma i mè öcc i crédan mia …

che emussión, al sangh as gèla … l’è ‘na maia dal Nuara!!!
ooohh Signur l’è ‘na reliquia, bèla cume un’ alba ciara …

i la guardi, i mè öcc i lüsan e am vegna fin un po’ al magón …
… i sto fèrmu … im movi mia … e sa staca un lacrimón

ch’ al finissa la só cursa propi in scima a cula cruss
propi dzura la scüdètt in dua ‘l bianch al va ‘ntal russ.

dèss la slarghi par guardala, l’è insí bèla l’è puesia!!
l’è la mè secunda pèll, duvrí massam par purtamla via

cun al durs dla man sinistra süghi i righi dla memoria …
… im na vó, la la maia in man…ma l’è tüta un’ altra storia

 

Forsa Nuara tüta la vita

 

Nonnopipo