Rimaniamo in contatto

Dialetto

I pagèli dal Balabiut

Published

on

MARCHEGIANI

Giuri che l’è l’ ültima volta che i parli da cula maja culùr rosa marmu da Carara

CASSANDRO

G’ ha mia paura d’ andà avanti e ‘nt al prim tempo al süpera al cunfin da metà camp par favurì l’assion in atacch. Se la vegna a savè cul raspatécc dal President ‘mirican agh mèta al dassi cume sül parmigian  

CAGNANO PISCITELLA

Banchieri l’urdina da impusessas dla cadena da destra e lur dü i roban la cadenina d’or al coll dal guardalinei

SBRAGA

Al prova a sustitüiss ai centrucampista, al prim lancio l’entra diretament in orbita, al secund ìn ancura in vià a dragà l’Agogna par truà ‘l balòn, al ters … al pret dla Madona Piligrina al vöra savé chi l’è ch’ a paga la vidrià dal Santüari dla Madona dal busch. Par al rèst i Tafàn e i Macaròn i pican la testa cuntra un mür da marmu … da Carara.

BELLICH

Al düètta cusì ben insèma a L’Andrea che Pavarotti e Carreras is la sugnavan, l’ünica stunadüra quand ìn perdù cul scilòstar (grosso e alto cero votivo) dal nümar cinq (na riferissi püssè avanti) e suma ciapà al gol 

COLLODEL

Al marca al prim gol, al maséna chilometri e balòn che ‘l smea che al lavura a còtim. Al prim erur al diventa un punto da riferiment par tüti i maicuntent e gratacü che spètan madumà una mèša par criticà. Comunque l’altrér l’ è passà dal bensinat e l’è fai milaliri da miscela al dü par cent 

BUZZEGOLI

Cun cui dò gambi grossi ‘mè ‘na costa da sèlar, as piassa davanti a la difesa e al pica ‘mè ’n ferè quand a serva. Al trova anca al temp da fa al geometra, al cap mastar e ‘l müradù. A fin carriera al metarà sü una impresa edilissia.

BIANCHI

Al rüsa, al cura, al cuntrasta, l’è generus ‘mè ‘na scurbèla e al finissa la partida immarlatà ‘mè ‘na siloria al més da Mars

CAPANNI

Prima dla partida i cumpagn g’ han dai la fassa da capitan parchè l’è stai bon da purtà la pleistescion ‘nti spugiatoi par inganà ‘l temp che fora a piuveva fort. I g’ l’ hann tirà via sübit quand ìn vist che i baterii eran scarighi. Comunque cun cul facìn da scola media l’è sveltu ‘mè ’n ghès a cacia da rani boti

BORTOLUSSI

Quand l’ è segnà i vurevi mia créd, i son stai insì tantu stracüntà che ho mia guardà al replay par paura che la sbagliava.

GAVINELLI Renato ( la frecia da Caltignaga)

L’ ho incrusià stamatina a fa la spesa e suma ciciarà ‘na bèla mèsurèta. Sarissan stai li a dasla d’intend, ma la gent la guardava da travèrs parchè ingumbravan al passagg. M’ ha di che sta ben ma g’ ha un ginöcc che la fa tribülà. Comunque m’ ho dismentigà metà dla roba che duvevi cumprà, e una volta a cà son ciapà una girada dla Nonnalanto, però quand i g’ho dì che s’eri emussiunà par avè parlà insèma al Gavinèll m’ ha perdunà, però m’ ha spedì indré a pià la roba ch’ la mancava.

Sustitüssion

NARDI  Al smea spaesà cume Salvini sü un barcon da profughi

PERALTA In quasi mèsura l’è sbaglià püssè passagg lü che Cassano i cungiuntiv int un ann

SCHIAVI TARTAGLIA PINZAUTI  Ìn giügà trop poch par fa di dann

BANCHIERI

Dopu vèss rivà in final al giögh dla rana al Circul di Spinasc, l’è pagà da bef a tüta la squadra, e sül taccuin l’è marcà chi l’ è bevü do volti

MUROLO ( Carrarese)

Da sicür quand l’era a l’asilu al faseva al gir di cestin par ciulà i merendi di altar fiulin sensa pü restituii. Adèss che l’è un povr oman al restitüissa mia al balòn süi falli lateral. Povar mischìn, grand e gross ciula e balòss. Gran figüra ‘d merda, ma mai cume la facia dal so alenadùr che gh’ l’ ha sügerì

TIFUS

Sabat sera al custant dla Merenduna l’è surtì insèma al Bigiu e al Marinon scigala e s’ hann inciuchì ‘mè tri buraci ‘d fanteria. Inveci al Serafin dal s-giaché vunc, dopu al crepatòn int al foss dla smana passà, l’e ciapà l’influensa

Nonnopipo

Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Continua a leggere
Clicca per commentare

Lascia un commento

Dialetto

… e dopu al Nuara i Spinasc!

Published

on

I gh’ avevi si e no vott o növ ani,

che ‘l mé ziu, brancà sü la bicicleta,

insema al Tigliu, al Bertu e al Bursàn,

as partiva tüti insema dla piassèta

 

mì sètà sü la cana, ‘na biciclèta sgangherà

par andà a véd al Nuara as cumincia a pedalà

 

 Via Verbano tüt d’un fià, as pudeva mia fà tardi,

as dueva fà una sosta propi al circul Leonardi

 

quatar bicér e un po’ da grapa sgardiunà in pé al bancòn

un lèca lèca e una spümin l’era la mé cunsümassion

 

e par mia fà d’ intort arivà sül largh Buscaglia

un’ altra sosta al Matteotti e cusí nissün sa sbaglia

 

al Bursàn as na n’ acorgia: “fiöi cumincia la partida!!”

via da cursa all’Alcarotti rivà in temp l’era una sfida.

 

da luntàn as senta i vuss suma ancù rivà in ritard!!,

vün al vusa e as senta ben: “arbitro ti sé un gran bastard”

 

“Dai anduma fasuma in prèssa dam tre cürvi par piasé!!

al fiulìn al paga mia, l’è poch püssè che un magaté!!”

 

al Bertu e ‘l Tigliu i rampìgan sü cui ass da legn bagnà

mi al mè ziu e ‘l Bursan i suma dré la raminà

 

propi quand, porca la logia, al Nuara al ciapa un gol

e al Tato un aversári a la ciapa par al col

 

sü la cürva l’è ‘na ribulgia ghè pericul d’invasión

quand al Ricu cun un tiràsc, ‘nt la ret l’ infila al balón

 

forsa Nuara! forsa Ricu!! sta sü in pé va mia par tèra!!

se na fasuma ancura vün i vinciuma anca sta guèra.

 

Adess al Ricu la bala ‘nti pé al cura dricc par scriv la storia,

na salta vün … na salta dü ma ‘l tèrs a la ransa mè ‘na siloria

 

Stramassa al Ricu, la facia ‘nt la fanga, l ‘è par tèra cun unúr,

intant al “bastard e disunest” l’è sübià e ‘gh dà ‘l rigur

 

Salta in pé tüt l’Alcarotti e ‘l President, al Sciur Santin

al cura vers al Ricu Bramati e sü la frunt agh dá un basìn

 

sül dischèt al va al Giannini … eleganssa e sentiment

tüt la stadio al vusa “goool” l’è la fin d’un gran turment

 

La partida la finissa e dü a vün l’è ‘l risültà,

però adèss in biciclèta dasi dasi as turna a cà

 

Alura al Tigliu infurma i altar, che prima da turnà indré,

se is fermuma mia a la Crava da duman al cambia misté.

 

Par la granda caritá füssa mai sta roba brüta!

urdinuma una margherita e la spassuma fora tüta.

 

i hin vot’ uri, però dla sera … piantumla lí da fa i paiàsc,

e ‘l Bursan ‘l fá una pruposta :”nduma a scena ’n di Spinàsc!!”

 

“Noooo!! la dona pö am vusa, vürarissi mia rüsá!!

pö g’ ho dré al mé nivud, i la devi purtà a cà”

 

“Dai ziu Mario it la prumèti che it farò mia tribülà,

al Nuara l’é vinciü sü dai anduma a festegià!!

 

Forsa Nuara tüta la vita

 

Nonnopipo

Continua a leggere

Dialetto

E anca stavolta l’è ‘rivà al derby

Published

on

Sarà che passa ‘l temp, sarà che son dré gni vécc, sarà chi n’ ho visti a sè, sarà che gh ho pü voia da fa la guèra a nissün, e fa la guèra l’è mai bèl, gnanca par giöch.

Sarà parchè la puntisèla tra mi e i àltar urmai la lassi giò sensa pü tirala sü: ch’ a riva un po’ chi l’è che gh ha voia da rivà, che tant g’ ho pü paüra da fam mal.

Sarà che urmai son cunsümà ‘mè un arlabach, o ch’ i son drera ingimbàm ‘mè ‘na pèrga dla bügà, ma son pü bon da capí sta rivalitá cun Varsé.

Un cünt l’è la balada, piàss in gir fin a mandàs da via ‘l cü (ho dì mandàs eh, mia mandài!!), altra roba inveci l’è dì o scriv robi dal tipu ” massumai tüti “ o “asfaltumai”, cume se i füssi al padron d’una impresa ch’ l’asfalta i strai.

E pö suma unèst e disuma la verità: sia a Nuara che a Versé i gh avuma dò squadreti che is la passan mia trop ben … forsi nüm giüst un cicinin püssè mia ben da lur.

Cunfèssi che una volta la pensavi int un’ altra manéra sensa tanti vèrs, ma ‘dèss, par i rasòn che son spiegà cinq o ses righi chi dzura i pudarji udià nissüna, e quand i disi nissüna i cumprendi anca cui da Versé; magari sensa véss par forsa grand amisòn.

Si, propi i tifus dla Pro Vercelli; che gh han una roba meravigliusa che spartuma insèma: lur i fann al tifo par la squadra dla sò cità, propi cume nün da Nuara, e da sti temp vissià e scarùss l’è ‘na roba tantu rara e da difend cunt i ungi par dò cità da pruvincia cume i nostri, anca se, sia nüm che lur, i suma pü cui da prima e i suma pruvà süla nostra pèl cusa vöra dì pagà al dazzi d’un faliment.

Da dla dal Sesia i fann al tifo par Sant Eusebi, da chì dl’ Agogna par San Gavdensi che ‘s rivulgeva al Vescuv da Versé ciamandal “Magister”. Lur i rüsavan mia par véss vün püssè impurtant a-dl’ altar, i gh avevan mia al bun temp, ma di bèli gati da plà, lur i eran amis e püssè fürb da nün che inveci suma bon da rüsà par un balòn.

E dismentigumas mai che fin un quai ann fa i suma spartì la muntagna püssè bèla dal mund: al Monte Rosa; Alagna d’una part e Macügnaga dl’ altra, pö hin rivá cui dal Lagh Magiùr e dl’ Ossola e cui da Bièla e hin rabaiá sü cul che i pudevan e ciau merlu!

Par indulsìs lur i mangian i biciulan, nün i biscutìn, che tüti e dü hin sfamà la gent, propi cume la paniscia e la panissa che hin nassü tüti e dò dla puvertà di cassini e dèss is permetuma da fa i sufistich: “l’è püssè buna custa, l’è püssè buna cul’ altra” sensa nacorgias che i suma propi tüti quanti di gratacü, nuares e versles: se ‘t piasa vüna at deva piasé par forsa anca l’altra, cüntumas mia di bali eh!!

Lur i gh hann al Gatinara e nün al Ghèmm…se propi propi  i vurì mia bev al vin di altar purtimal a mi che da diferensi na fo mia da sicür.

La Basilica da Sant Andrea, che l’è cunsiderà vün di prim munument gotich d’Italia e la cüpula da San Gavdensi che gh ha mia da bisogn da véss decantà tantu l’è bèla e la cumencia a rampigà vèrs al cel parténd da dzura la sò Basilica, e se ti sè bon da rivà fin in scima ti pudarè véd madumà di gran risèri, risèri tüt in gir, da chì cume da d’ là, sensa la püssè picula diferensa, cusì par casu o par rasòn.

Furse chi l’è scernü o surtegià cume spartì tüta sta roba, a l’ha fai sensa fa d’ingann.

Suma nün che i gh avuma al bun temp e suma diventà tantu tantu smorbi.

I ma scüsi se un quai vün da vüaltar al farà fadiga a légg al dialèt da Nuara, ma l’è una manéra par sentìm püssè visìn a la mè cità, e da cunsguenssa anca a la mè Maja.

Forsa Nuara tüta la vita.

Bun derby a tüti.

Nonnopipo

Continua a leggere

Dialetto

Il prossimo acquisto di Lo Monaco: La Paniscia.

Published

on

La vegna ndi cassini e l’è un piat dla povra gént, l’è ‘l ricord d’una vita grama quand sül tavul gh’ era gnent.

 E quand la nebbia, vèrs Nuembar, l’era grisa ‘mè la fam, e un purscé, che tacá sü al serviva a fa i salam

 as capiva a la sveltina e sensa tèma da sbaglià, che al temp da fa la paniscia uramai l’era rivà.

‘S cuminciava tri dì prima cun la verša già brinà, ‘s bütava dentar i fasö, un po’ intér un po’ schiscià

 ‘s faseva bùi un po’ da cuji, un toch d’oss bèl divussiùs, e al brod, dasiot dasiot, al cuminciava a gni mustùs.

 Un para d’uri i bastavan mia, agh na vüreva cinq o sés, e se gh’ era mia temp … as saràva un öcc … va ben l’istéss!

 Pö ‘s ciapava un bell cudrö che s’ üsava fai da ram, e ‘s tirava fó dla duja ‘na fidighina e un bèl salam.

 Sül tajér* as pistava al lard e fina ‘s triava ‘na carota, un po’ ‘d sèlar, una scigula fin a quand ‘al cüdrö a scota,

 Quand al bütér a sfrigulava e al ris al gnéva ben tustà, s’ argiungeva ‘na buta da Spana a föch alégar par sügà.

 Pö l’era ura, sensa prèssa, da purtà a cutüra al ris, dasi dasi cun passiensa par mia fà di gran pastìs.

 Un quart d’ ura … vint minüt, trusà ben e cun curagg!!! manca dess numà una roba: una gratada da furmagg!!!

 Pö un toch da cul bütèr che ‘l fadiga a slenguà, as trusava ben … sensa paüra, pö ‘s lassava ripusà.

 Un öcc al tàvul … l’è tüt a post … anca al vin al manca mia, e tüti insèma ‘s mangiava la paniscia che a Nuara l’è puesia!

 Uramai l’è un bot e mèss e a l’Alcarott giöga ‘l Nuara, ‘s branca in man la biciclèta a chi riva prima ‘s fa la gara,

 Sarà ‘l vin in abundansa e tri piatt da cul risòt che sü i ass da legn dla cürva as finiva a fà a cassót.

 Tüti bulà ‘mè un pach pustal e sgarblà ‘mè ‘na saràca, Ma da vusá “forsa Nuara” la nostra vus l’ era mai straca.

 E l’è cun grassia e curtesia mis-cià bén cunt al rispèt che un cunsili al Sciur Lo Monaco igh la dò in dialèt:

“se ti vöri diventà un cicinin un po’ Nuarés da paniscia ti devi mangiàn, mia un piàt ma cinq o sés”

 

Nonnopipo

*licenza poetica, piú correto sarebbe “pistalard”

Continua a leggere

NSN on Facebook

Facebook Pagelike Widget

Telegram

Ultimi Articoli

Copyright © 2017 Zox News Theme. Theme by MVP Themes, powered by WordPress.