Rimaniamo in contatto

Dialetto

I pagèli vigliachi

Published

on

MARCHEGIANI

Al vegna fora dla porta cume sa füssa un’ uscita da sicürèssa quand a gh è un incendi, e grassie al curs che al frequenta al Circul dla Crava par imparà al dialèt, al manda tüti a da via ‘l cü

CASSANDRO

G ha propi la facia d’un braf fiulòt ma al nümar 28 dal Gušan la pensa mia cusì quand a mumenti, al nostar tersin, agh fà un ‘ uperassiòn al ginöcc sensa l’indormia.

POGLIANO

Al sò aversari al dà fora da matt quand as renda cünt che l’è l’ünich giügadur cun la mascagna che sa sposta a l’ucurensa, cume la göba da Igor, ansi, Aigor (Marty Feldman) in Frankestein Junior

CAGNANO

‘nt l’assiòn dal gol dal Gušan che i suma ciapà ‘nt al prim temp, s’ ha lassà fai sü ‘mè ’n gamissè da lana … ma … ‘nt al prim temp i suma ciapà gol? Nooo? Ma da bon? Ma i sì propi sicür? …  Cramentu!! Giüri che la prossima volta che fò i pagèli i tuchi mia al butiglion

SBRAGA

Agh mustra ai tri fiulòtt dla difesa cume ’s fa a sta al mund, in camp e fora. Pensì che a Novarello al fà al gir d’ispession a nov e meša vusànd: “Schema uno, tutti in branda, Cesare, scala in basso una posizione del letto a castello!! … Schema due, dormire!!” Di volti a sbaglia stansa e Pablo agh disa: “Andrès, vas a donàr el cuelos”

SCHIAVI

Al ciama al permèss a la Walt Disney par giügà la partida cuntra i nanètt dal Gušan, e quand i la ciaman par la sustitüssion l’è invià ch’al mangia un sachèt da patatini e al beva una spremüda da purtügal, cusì s’ha imbruacià la maia che par fa ‘ndà via i smagi agh vöra la cunigrina. Walt Disney  dü Gušan šeru

BUZZEGOLI

Dopu la muria da pès int l’Agogna da dumenica, s’ha infurmà se gh è un quai fiüm ch’ al passa visìn la stadio dal Gušan. Dopu che g’han assicürà che da cui parti passa gnenta l’ è pü sbaglià un passagg, però, par véss tranquil l’è fai la licensa da pesca.

BIANCHI

Fin l’altrer al faseva al gir d’Ispession insèma a Sbraga, ma cun cula ghigna seria e scüra i bocia, da not, gh avevan paüra e fasevan di brüt sògn e durmivan pü. Adèss Sbraga as porta drera la gigantografia da Perrulli, e i fiöi i ghignan cume i matt.

PISCITELLA

Al salta i aversari ‘m’è saltà la cavalina intrament che al cünta i barselèti in napuletan che però nissün a capissa. E quand i a spiega, l’ünich che agh dà mia da tra lè al Peralta che però ‘l fa gol 

BORTOLUSSI

Al giöga a destra, in mèss e a la mansìna; se inveci da giügà al fulbar l’era un pulitich, l’avrissa girà püssé partì lü dl unurevul Casini.

PERALTA

Anca lü cume al sò cumpaesan grand ugual, al ciama al permèss a la Walt Disney che la rinücia cusì a dü di sètt nanu. E quand al nostar Gian Mario agh prumèta che duman matina ga spiega i barselèti, par ringrassial al segna al gol dal vün a šèru.

SUSTITÜSSION

Nardi: ’S ha taià i cavei parchè al nonu Buba sensa ügiai la scunfunda cun al Ricardino

Collodel: L’è giügà madumà un toch dal secund temp cusì l’è pensà ben da turnà a ‘Mlogn a pé e da cursa

Gonzalez: Al cuntratt incö al prevedeva la culassion, disnà e scena e un quart d’ura da partida.

Pinzauti: Al custringia al Sciur Banchieri a rivolgias al Dutùr di matt parchè al sà mai se ciamàl PinzÀuti o PinzaÙti?        

BANCHIERI

Quand al Peralta l’è segnà al prim gol, l’è fai un tramentu salt e l’è picà la sciüca cuntra la tetoia dla panchina. La TAC l’e dimustrà che la tetoia s’ ha fai gnenta.

Tifus

Al Rumulìn dla gèra l’è scarpüscià süi scalìn dla piciunaia, ma par furtüna al Pidrin al verdüré l’è fai in temp a brancal par la s-giaché, però l’è ciapà ‘na scancalòn e s hà disluà al garèt e dèss al sopa ‘mè ‘l Barreto.

Nonnopipo

Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Continua a leggere
Clicca per commentare

Lascia un commento

Dialetto

L’ ültima nèbia

Published

on

T’ ho cunussù tanti ani fa drera i ültim palassiòn,
fin duva l’ ariva lüminusa e frèda la campagna,
renta i foss, urmai bèi süc dla fin stagiòn,
rasént a tèra, bassa bassa la ristagna.

Misteriusa cume ‘l vél d’una dona in gésa,
absentа* ‘mè ‘l faseva al magu dla Bicoca
suta un sul a- spurch, dla facia smorta e ufésa,
as tacava giò par tèra ‘mè un fiulin tacà la soca.

Dasi dasi la gneva ‘vanti sempar seria e silensiusa,
la rabaiava tüt cul ch’ la truava in sü la stra,
la pareva véss una gran dama tenebrusa e dispetusa,
‘mè ‘na fiulina che g’ ha voja alégra da giügà.

As lassava drera un paesagg da sògn,
spess ‘mè ‘n mür, duls ‘mè ‘na puesia,
che ti la leggi quand al cör agh n’ ha bisogn,
che dai sò rimi ti vurissi pü ‘ndа via.

E quand par man t’im cumpagnavi a scola,
i calson cört e la narigia giò dal nas,
‘nti scarpi strèti fai da curàm la sòla,
da s-ciarà gnenta i s’eri fina persüas.

T’ ho sempar vursü ben cume ‘n’ amisa
anca dess che ti t fè véd pü gnent dal tüt,
e se Nuara la to presensa la renda grisa
i rimpiangi cui mument anca se brüt.

Cume quand a dl’Alcarotti ti ‘scundevi San Gaudensi
e ti rivavi dal Valentino scavalcanda ‘l mür
e par véd un toch dla partida as faseva i penitensi
parchè a quatr’ uri dla bassura ti fasevi gni giò scür

Adess sensa da ti i giurnai in bèli e lüminusi,
anca se patissi un po’ la tò mancansa
che a füria da scargà in cel robi scarusi
da gris duarji sbianchì tüta la stansa.

L’è tantu temp che urmai s’ancuntruma mia
partend da Vèvar par rivà fin a Pernà.
un po’ da trüch un po’ da cipria e cusì sia,
t’ sè diventà ‘na sciura liganta e riservà,

E quand cul dì che prima o pö par tüti al rivarà
se ti vöri fam un regal cun grassia e curtesia,
vegna giò ancù ‘na volta sü la mè cità,
vegna giò ancura a fam un po’ da cumpagnia.

Nonnopipo

*scomparso nel nulla

Continua a leggere

Dialetto

I pagèli dl’influensa e dla sciatica

Published

on

I pagèli cun l’influensa e la sciatica grassie a SportItalia

 

Raspa  

Am da una man fasend un’ uscita che püssè gnuranta d’ insì as mora. Pö as riscata cun un’altra da inteligentòn

Bonaccorsi

L’ intervent püssè dificil a la fa quand da lateral al passa in mèss a sustitüì Benassi infurtünà.

Benassi

L’ intervent püssè dificil a la fa quand da central al passa in panchina quand l’è infurtünà

Agostinone

Anca se al g’ ha la grassia e la delicatessa d’una mietitrebbia, la so presensa in camp l’è indispensabila ‘mè al green pass par entrà int l’usteria

Paglino

Al so dirèt aversari l’ han purtà via cun l’ambulansa intrament che al vusava <Purtim via, luntan da cul lì cunt al trentadü sü la schena, i la vöri pü s-ciarà gnanca in cartulina>

Vaccari

Dopu la partida l’è ciapà al cestin dla merenda e g’ ha bütà dentar al gol. stasera cume premi g’ ha al permèss d’ andà a durmì a dés e mèsa che duman as deva andà a scola

Tentoni

Al giöga una partida da premi Nobel e cul recupero dla bala al vutantanövesim che al manda in gol al canibal Dardan, al merita l’espusission int la Galeria di Uffizi a Firense

Di Masi

Se al segna mia, almenu un assist da gol la fa sempar. Al tira al carèt cume al mülu dal Sciur Cichìn, e prima o pö un po’ da ripos a la merita.

Laaribi

Al merita un bèl vut in pagèla, sia parchè l’è stai bon da fa un fallo a giögh fèrmu, sia par la  petinadüra che la cataluga cume ambasciatur dl’ ignuransa cume agh piasa a nüm. Se pö i pensuma che Dardagnan al pretenda la so amunission quand agh va doss ris-ciand l’infurtüni, al diventa un idolo.

Vuthaj

Cun la so facina da sicàri dla mafia giapunesa, al sumena al terur in mèss dla difesa aversaria. Incö l’è penetrà in area püssè da quantu Selèn l’è stai penetrà in tüta la so carriera.

Gonzalez

Cume premi par la buna prestassion cuntra al Casal, la sucietà g’ ha cuncès al lündas da libertà

par andà a véd i cantier

 

Sustitüssion

Amoabeng   I prim dü passag i hin sbaglià, e cume al pulissa la bala cun la majèta prima da bat al fallo lateral a significa che l’è sü la stra buna par diventà vün di gnürant che i preferuma

Bortoletti  Al lavur püssè dur l’è infilà la fassa da capitàn

Capone  Al sustitüissa Paglino e al reclama parchè da cula part al trova al camp giüstà cume se a füssa passà la siloria.

Brucoli – Scariano  Benvegnü

Marchionni  I dü esterni dal centrucamp i fan un lavur dla Madona e i rüscan sensa alsà la testa. Buna l’idea dal Mister, cume cula da uffrìgh sübit un cuntrat par fa i pulissji a cà sua dò uri al dì, méi dopu l’alenament cusì i pulissan anca la docia.

Nonnopipo 

Continua a leggere

Dialetto

La paniscia … azzurra

Published

on

Tutti gli anni, con l’arrivo del primo freddo, quando la brina rende croccanti le verze, ho il piacere di riproporre queste rime.
La vegna ndi cassini e l’è un piatt dla povra gent,
l’è ‘l ricord d’una vita grama quand sül tavul gh’ era gnent.
E quand la nebbia, vèrs Nuembar, l’era grisa ‘mè la fam,
e un purscé, che tacá sü as trasfurmava in salam,
as capiva a la sveltina e sensa tèma da sbaglià,
che al temp da fa la paniscia finalment l’era rivá.
‘S cuminciava tri dí prima cun la versa giá brinà,
‘s bütava dentar i fasö, un po’ intér un po’ schiscià,
‘s faseva búi un po’ da cuji, un toch d’oss bel divussius,
e al brod, dasiot dasiot, al cuminciava a gni mustùs.
Un para d’uri i bastavan mia, agh na vüreva cinq o sés,
e se gh’ era mia temp…as saràva un öcc….va ben l’istéss!
Pö ‘s ciapava un bel cudrö che s’ üsava fai da ram,
e ‘s tirava fó dla duja ‘na fidighina e un bel salam.
Sül tajér* as pistava al lard e fina ‘s triava ‘na carota,
un po’ ‘d sèlar, una scigula fin a quand ‘l cüdrö a scota,
Quand al büter a sfrigulava e al ris l’ era ben tustá,
s’ argiungeva ‘na buta ‘d Spana a föch alégar par sügá.
Pö l’era ura, finalment, da purtá a cutüra al ris,
sensa prèssa cun passiensa par mia fà di gran pastís.
Un quart d’ ura…vint minüt, trusá ben e cun curagg!
manca dess numà una roba: una gratada da furmagg!
Pö un tocch da cul bütér che ‘l fadiga a slenguà,
as trusava ben……sensa paüra, pö ‘s lassava ripusà.
Un öcc al tavul…l’è tüt a post…anca al vin al manca mia,
e ‘s mangiava la paniscia che a Nuara l’è puesia!
Uramai l’è un bott e mèss e a l’Alcarott giöga ‘l Nuara,
‘s branca in man la biciclèta a chi riva prima ‘s fa la gara,
Sará ‘l vin in abundansa e tri piatt da cul risòt
che sü i ass da legn dla cürva as finiva a fà a cassót.
Tüti bulà ‘mè i pumcudógn e sgarblà ‘mè ‘na saràca,
ma da vusà “forsa Nuara” la nostra vus l’ era mai straca
* licenza poetica
esatto sarebbe “pistalard”
Nonnopipo

Continua a leggere

Telegram

Facebook

Ultimi Articoli

Copyright © 2017 Zox News Theme. Theme by MVP Themes, powered by WordPress.

%d blogger hanno fatto clic su Mi Piace per questo: