Dulsa ‘me ‘na magiustra catá dla prösa

russa dla passion cume deva véss ‘na rösa

 

bianca cume la fioca in scima la muntagna

rigugliusa cume la tèra generusa dla campagna

 

fresca mè un rundanin ch’al riva a primavera

sincera ‘mè ‘na preghiera recità quand vegna sera

 

una maia culurà cun la passion d’ un amúr eternu

tantu fort quantu l’è frèdd e brüt un lungh invernu

 

una maia che la parla al dialèt dla sò Nuara

fai da nebbia da risèri generusa e mai avara

 

granda e grossa cume la cüpula ‘d San Gaudensi

garbà e rispètusa ma sensa tanti riverensi

 

cunt al stadio tra via Sutil al Valentin e via Alcarott

e ‘l Campurell ‘nt al Muntriö ch’al fa sü i so biscott

 

mia lumbarda ma a vuré ved gnanca piemuntesa

urgugliusa e cuntenta da véss ‘na spusa nuaresa

 

riservà cume la nebbia silensiusa e spessa dla matina

d’or e lüsenta cume ‘l Salvatur sü lá in scima

 

‘rumatica e prufümà ‘mè ‘l cafè dal Balussín

sghèlma precísa e forta cume un pügn dal Sguaitín

 

savrí e güstusa mè ‘n sarachín pucià ‘nt la sal

giuiusa e alégra ‘mè ‘na maschera da carneval

 

benaugüranta cume béf in cumpagnia ‘l bicér dla stafa

piena d’amúr e amicissia cume da vin una carafa

 

rissulina e scaprissià ‘mè ‘na fiulèta malissiusa  

minüdria e legera cume una müsica armuniusa

 

una maia che a testa alta la porta in gir un sentiment

parchè dal milanövcentevott la cunussa mia al faliment

 

una maia ch’ l’è l’ urgoli da Nuara e la so pruvincia

da sentìla tacà al cör se la perda paregia o vincia

 

‘dèss im rivolgi ai giügadur e la fò un po’ a la mè manera

prima da mètt indoss la Maia pruvì a légg ‘sta preghiera

 

Amate la vostra società 

e la maglia che portate 

difendetela

siate dei generosi in campo 

la gente vi applaudirà sempre

(Silvio Piola)

 

Nonnopipo