Free picture (The flower on the grave) from https://torange.biz/flower-grave-22795 Dialetto

lI son purtá un fiur / sü la tumba d’un mè amís

vün da cui che al mund hin fai / madumá di gran pastiss

e ‘dèss lì al cimiteri / intramement chi carèssi la so futugrafia

‘nt la testa s’ incrusian i ricord / d’amicissia giuventü e alegria 

peró l’era un brav fiulót / cun al cör sempar prunt in man

e una vita schifusa vigliaca e grama / una vita un po’ da can

prima tanta puèrtá / e pö una brüta e spurca malatia

che sensa tanti riverensi / la só mama agh porta via

al resta al mund madumá lü / lü insema al só papá

che pürtropp la lassa sempar / par pudé andá a lavrá

in gir vistí ‘na quai manera / cun i ciápi da dréra süi calsón

par lü l’era ‘mè la müda növa / da pudé bansí int i uccasión

la ghigna scüra al cü par tèra / l’è düra quand al mund al gira stort

al pensa rassegnà che l’ esistensa / a lü g’ ha riservá di grand intort

trist e invèrs mè ‘na calsèta / ma cuntént fin a sta pü ‘n t la pèll

quand al camp dal fulbar al giügava /e al mund ga smeava pussè bèll

al vureva fá ‘l purtié / ma l’era impastá mè i gratón d’oca

e la passiensa la savuma / par chi’ l’è dré perd l’e sempar poca

“mì son cume al Tato Lena / e furse son anca püssè bon … “

ma d’ in fund la rét l’era facià / madumà a tirà sü di gran balòn

 e gió un frach da parulasci / intant a lü agh na faseva gnént

parchè giügà in mèss di pal / la rendeva alégar e stracuntént

anca se par dila tüta / sensa vurè par forsa a parlà mal

l’era svìcc e sveltu cume quand / it dann l’indormia a l’uspedal

ma scundü dré un quai cantón / ti trovi spess di brüti andáni

che se ti sè mia püssè che fürb / ti t giöghi ai nümar tüti i tó ani

e insì s’ ha giugá in un culp / tra una  una cundana e un’ ilüsión

prima al so destin e dopu al fisich / pö l’anima la ment e la rasón

l’è ‘ndai via dasi dasi / ‘mè i guti sü ‘na foia dismentigà dla rusà

‘mè una stèla lassà visca la matina /che al ciar al vöra mia smursà

s ha fai tardi e fà un po’ frèdd /  i nivli culuran al ciel da gris

int un vas sens’ acqua infili / i ricord e una rösa par al mè amis   

che al vureva fá ‘l purtié / ma l’era giüstà mé un arlabàch

e da purtagh sü la tumba un fiur / par lü saró mai stràch.

Nonnopipo


Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Lascia un commento

%d blogger hanno fatto clic su Mi Piace per questo: