dal camp dl Enel a Nuarèll Dialetto

E st’ invernu ch’al sà d’està cunt’ l’aria calda e inquinà

i so mia quala l’è la rasòn che ‘m riporta indrè al passà,

quand sül camp in fianch dl’ Agogna ‘pena prima dal cürvòn

in mess d’la fanga e sensa l’erba s’alenavan i mè campiòn.

Eran i  temp che süi maièti gh’ eran mia scritt i nom

e i  avversari is ciamavan Lecch, Telgate, Büst e Com,

e se i büti un toch indré i cunfin dla mè memoria

là, in fund sui camp ad l’Enel, la cumincia un’ altra storia,

cundì d’amur, da giuvinessa, da speransa e d’alegria

quand giugavan cui dal Nuara i vurevi pü ‘ndà via.

Adess s’alénan in t’un post che a guardal at manca al fià

la palestra, al camp sintetich, disan che ghè anca la spa!

Manca gnenta…a ghè dal tüt par fa ben al so mistè,

a ghè fin un president che tüti i mes al cacia i danè.

Però ‘dess l’è quasi ura da fa un tüff dentar la storia,

ricurdà cui giügadur che i cunsèrvi in t la memoria.

I cuménci cunt al Tato cunt un fisich da paüra

che pruvà a fagh un gol l’era propi tantu düra,

pö al Nini tütt pelà e al Canto cunt la mascagna,

a vedei giugà in difesa l’era cume na cücagna,

e ‘l Renato al Gavinell svicc mè ‘l fülmin d’un tempural,

al cureva sü la fassa e ‘s pudeva mai fermal,

al Carrera nümar vott che ‘l rivava da Burbané

al saveva cusè fa cunt al balòn in mess di pè,

e al Ricu cunt al cü bass che ‘l smeava andá in guèra,

anche se ogni tri par dü al finiva semp par tèra.

Al Giannini al Milanesi, al Gabetto barbisòn,

par andà a l’Alcarotti gh’era sempar ‘na rasòn.

Adess peró cun gran rispett vöri fa un grand inchín,

i la fò al mè President, al Tarantula Sciur Santin.

Nonnopipo


Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Lascia un commento

%d blogger hanno fatto clic su Mi Piace per questo: