Incö a segna al Ricu Dialetto

I gh’ avevi si e no vott o növ ani,

che ‘l mé siu, bruncá sü la bicicleta,

insema al Tigliu, al Bertu e al Bursàn,

as partiva tüti insema dla piassèta.

Via Verbano tüt d’un fiá ,as pudeva mia fá tardi,

as dueva fá una tappa propi al circul Leonardi.

Quatar bicer e un po’ da grapa sgardiuná in pé al bancón,

un lèca lèca e una spümin l’era la mè cunsümassion.

E par mia fá d’intort, pena rivà sül largh Buscaglia,

un’altra sosta al Matteotti e cusí nissün sa sbaglia.

Al Bursán as na n’acorgia: “fiöi, cumincia la partida!!!!”

via da cursa all’Alcarotti, rivá in temp l’era una sfida.

Da luntan as senta i vusi, suma ancú rivá in ritard!!!!,

vün al vusa e as senta ben:”arbitro ti sé un gran bastard”

“Dai, avanti, fasuma in pressa, damm tre cürvi par piasé!!

Al fiulìn al paga mia,l’è poch püssè che un magaté!!!”

Al Bertu e ‘l Tigliu rampígan svèltu sü cui ass da legn bagná,

inveci mi, ‘l mè siu e ‘l Bursan tacá ‘mè la grighèra a la raminá,

propi quand porca la logia, al Nuara al ciapa un gol,

e al Tato, un aversári, a la ciapa par al col,

Sü la cürva l’è ‘na ribulgia, ghè pericul d’invasión,

quand al Ricu cunt un tirasc, dent la ret l’ infila al balón.

Forsa Nuara!! forsa Ricu!!, sta sü in pé va mia par tèra!!!

se na fasuma ancura vün i vinciuma anca sta guèra.

Adess al Ricu, la bala ‘nti pè, al cura dricc par scriv la storia,

na salta vün…na salta dü ma ‘l ters la ransa mè ‘na siloria.

Stramassa al Ricu la facia ‘nt la fanga, l’è par tèra ma cun unúr,

intant al “bastard e disunest” l’è sübiá e ‘gh dà ‘l rigur.

Salta in pé tütt l’Alcarotti e ‘l President, al Sciur Santin,

al va da cursa vers al Ricu e sü la frunt agh dá un basín.

La partida la finissa e dü a vün l’è ‘l risültà,

però adess in bicicléta dasi dasi as turna a cá

Alura al Tigliu l’ infurma i altar, che prima da fa la strà a l’indré,

se is fermuma mia a la Crava da dumàn al cambia mistè.

Par la granda caritá!!!! füssa mai sta roba brüta!!!

urdinuma una margherita e la spassuma fora tüta.

“Hin voòtt uri peró dla sera…piantumla lí da fa i paiásc”,

e ‘l Bursan ‘l fá una pruposta :”nduma a scena ndi Spinàsc!!”

“Noooo!!!! la dona pö am vusa, vürarisi mia rüsá!!!!!

pö gh hó dré al mé nivud , i la devi purtá a cá”.

“Dai šiu Mariu, s’ inventuma che la bicicleta i suma büsgà

al Nuara l’é vinciü dai !!!! anduma insèma a festeggiá!!!!

Forsa Nuara tüta la vita

Nonnopipo


Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Lascia un commento

%d blogger hanno fatto clic su Mi Piace per questo: