Rimaniamo in contatto

Dialetto

La duménica dal Tigliu, al Gügia e ‘l Culunèll

Published

on

‘dess i büti giò dò righi e la fò in dialètt
ma a la lengua dl’Alighieri i manchi mia da rispètt

i la dedichi cun grassia a cui che gh hann i cavei gris
e in mess tra buca e nas bianch i gh hann anca i barbìs

Esercissi da memoria…quanti robi am vegna in ment!!
e i ricord i scapan via …  sveltu cume un culp da vent

una curt in periferia e un bel fulbar suta ‘l brasc
i fiulín a pé par tera…e fa gnenta se ghè ‘l giasc

as giügava in mèss dla strá che da machini agh n’era mia
e nissun a prutestava … gh’era rispètt e tanta alegria

i püssè grand is cimentavan cunt’al füm dla sigarèta,
e par cumprai dal tabachin i restavan in bulèta

e insema ai sigarèti as cumprava ‘l “cevingùm”
e quand ti la mastigavi al fiá ‘l saveva pü da füm

E cusí un dí dré l’altar a rivava al dí dla festa
im ricordi che s’üsava fa ‘l risott…tri pügn a testa

e se pö a na vansava….mia paüra…as fa rustí …
e la scena l’era prunta anca par al lünedí *

as bütava un bèll tocch d’oss a buì dasi int la ramina
un tocch da carna grassa e magra e dó ali da galina

‘na gamba ‘d sèlar una scigula una carota e un po’ d’udúr
e tüti quanti eran cunvint che serviva pü ‘l dutúr

’n a sfrìss da pévar una brancá ‘d sal e un biceròt dal butiglion
se ti’gh vedevi mia al cü vüreva dì ch’ l’era mia bon!!!

dèss al nonu capé in testa al dà föch a la scigàla
l’è un prufüm che ancura adess la memoria am regala

silensius un po’ingübí sprufundá sü la pultruna
tütt darnà mè la giustissia ma la ment ancura buna

un fil da vus par cüntà sü i ani brütt passá in guèra
tra miseria e puvertà cunt al cü spurch pugià par tèra

E ‘l ricorda, la facia scüra, quand in bumbardá ‘l Buschètt
e quand da nott passava ‘l “Pippo”**ti t’ anfilavi suta al lètt

dopu un po’ s’andurmentava…sarà stai culpa dla barbera
nün s’andava a giúgá ‘nt la curt fin a quand faséva sera

quand tütt a stort rivava ‘l Tigliu in biciclèta dla cità
e a tütt al mund lü al ripurtava dal Nuara al risültà

e ‘l cüntava a tüti dla partida al dava fin i furmassión…..
….tri a vün suma vinciü!!!! Suma propi di campiòn!!

passa al Gügia e ‘l Culunèll che a brascètt is tegnan sü,
e al Tigliu int’un mument i la mandan da via al cü

“Impustur d’un brütt malnàt ti a l’ Alcarotti ti s’eri mia
ti sè stai par tüt al temp a inciuchìt a l’usteria”

e al Tigliu cun fari séri e la lengua un po’ impastà:
“i si propi dü balabiùtt guardiv doss ‘mè i si giüstà”

Is dann ’n’ ügiada da travèrs e agh trèma fin al barbaròtt
hin già tacà ‘l bancon dal circul che i bevan l’ültim biceròtt

che bei ricord dal temp passá che una rüga a ia porta via
che la memoria e la nustalgia hinn vursü scriv una puesia.

Nonnopipo

* lunedí in luogo di lündas. (licenza poetica)

** pippo: nome popolare con cui veniva chiamato un aereo di cui la notte si sentiva solo il rumore sordo e mai partecipò ad azioni di guerra.

Essendo sconosciuta la provenienza e la nazionalità alimentò storie e fantasie popolari.

Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Continua a leggere
Clicca per commentare

Lascia un commento

Dialetto

Giüstissia.

Published

on

Quand im trovi al Piola, che l’è la mè secunda ca, e senti parlà al dialèt, istintivament im volti a la ricerca da chi, in cul precis mument, l’è dré parlal.

Un po’ cume quand tit trovi luntan da Nuara, o adiritüra a l’estero, e at capita da sentì cula lengua cusì particular.

Ti vurarji sübit identificà al “pruprietari” da sta parlada, füssa mia d’ altar par ribadigh, urgugliusament la stessa pruveniensa e la cundivision sulidal dl’ identich idioma.

Parchè nüm, che i parluma al dialèt, i suma sicürament da Nuara, o quantumenu i n’ uma respirà l’aria fin da fiulìn.

Ti sculti cula parlada cusì particular, che g’ ha mai schiscià l’öcc a la réal Türin, e l’è luntanissima par cadensi e armunii a la püssè renta a nüm Milan, che sübit la ment la va a verificà se l’esista una quai cunuscensa cunt al tipu che ti gh è d’innai, süperand int un santi e amen tüti cui inütil cunvenevul.

Suma da Nuara, a basta cul, l’è una carta d’identità a pèl, ansi, a lengua, una testimuniansa a cel düèrt, e l’è sè cusì.

E sübit ti entri in sintunia cun ‘sta persuna, purtatur san da nuaresità, ambasciatur storich e cultüral e, ‘diritüra, Ministar di esteri dla to cità. Chissà se i Sindich che i hin guvernà Nuara eran, o i hin bon da parlà al dialèt? Da vün son sicür, l’era al Lisandar Bermani, che l’è scrivü di puesii che quand ti a légi it fan gni sü la pèl d’oca!!

Inveci al Sciur Nissün che ti ghè davanti al parla un dialèt cun la certificassion da madre lengua nuaresa.

Ma gh è un particular, che püssè da qualsiasi altra cundivision teriturial, e püssè da qualsiasi legàm pulitich, agh i identifica cume citadin dla santa madre patria nuaresa, as manifesta quand ti vegni a savé che al fradèl che ti gh è davanti l’è, anca lü, un tifus dal Nuara Calcio 1908: 1908 parchè nüm i s’evan mai falì, fin a quand una brüta rassa da manigold, nissün da Nuara, l’è pensà ben da fa sciüstrina di nostar sentiment e dla nostra storia. I cinés i disan da sétat sü la riva dal fiüm e spétà cun passiensa che, prima o pö, al cadavar dal to nemìs al passa. E cusì, par furtüna e giüstissia, ho legiü sta matina prestu, che la Guardia da Finansa gh ha pensà lé a dagh la pussibilità a l’ültim rivà da sta quadrascia da vigliacòn, d’ avegh tantu temp a dispusission pa imparà a légg e parlà al nuares, sbatandal in galéra. Che bèla nutissia, anca se, a dì ‘l vér, i provi un sentiment da tristèssa mis-cià a rabbia.  

Ma lassuma pèrd sta brüta storia e turnuma al nostar amìs, che cume tì al ricorda al prufüm di ass da legn bagnà dla cürva dal mercà, che d’ invernu i giasciavan, e suta al prim sul dla primavera, i rinsecchivan fin al punto da büsgat al cü suta furma da schégia. Tai lì i dü nuares d’una certa età che in mèss d’ una strà i ricordan i giügadur che i hin fai part dla vita da tüti e dü, ben sètt sü vündas i eran nuares!!, al Tato Lena, al Canto, Mascheroni, al Lüisin Giannini, al Renatino Gavinelli supranuminà la freccia da Catignaga, al Testa Celestino da Cameri e cul che ancura incö l’è cunsiderà la bandiera dal Nuara, profugo dl’ Istria, ma nuares a tuti i efètt: al grand Nini Udovicich. 

E cusì, cun un ricord dréra l’altar, i finissan par pruvà cumussion quand as va a finì a parlà dal President da cul Nuara, al geometra Santino, si, Santin e bom, parchè vün da famiglia ti la ciami mia par cugnom.

Is lassan dopu un po’, cinq, dés minut, forsi un’ura ‘bundanta, ma gh ha mia impurtansa. I s’ han mia scambià al numar dal telefono e gnanca i nom … l’è bastà sentì girà par aria una quai parola in dialet nuares par demulì qualsiasi mür, qualsiasi barriera: in fund a basta poch quand l’è tantu cul che ti gh è in man e int al cör. L’è stai sè truvas e cunussas luntan da Nuara par ricurdà l’Alcarotti e cui ass bagnà cunt una quai a-scheggia che ta spungeva la pèl dal cü.

‘Dèss al Piola l’ è tüt fudrà da pultruncini che mì i cuntinui a ciamà scagnìn, e al dialèt l’è sempar püssè rar sentil parlà, testimuniansa sincera che al témp al passa e i tradission is trasfurman in ricord, ma una speransa am piasarissa cultivà cun tenerèssa: che un dumàn, tra tantu temp, al nostar President dal Nuara “Fulbar Clab” la ciamaruma madumà cunt al sò nom, Massimo, cusì cume i ciamavan Santìn cul che l’è stai al mè President.

L’è l’augüri püssè sincer che igh podi fa.

E dopu che i dü nuares i s’ han salüdà e i hin andai ognün par la so strà, al durs dla man al va a sügà l’ümid di öcc, intrament che al cör e l’anima i süssüran cun infinì amur: “forsa Nuara tüta la vita”.

Nonnopipo 

Continua a leggere

Dialetto

Un “bagn” int l’Agogna as néga a nissün

Published

on

Im caci dré a scriv una puesia, int la lengua dla mè gent

una puesia che la parla un po’ da tütt e un po’ da gnent

 

una puesia nè lunga nè cörta che ti la podi anca cantà

cun i paroli d’ una cüntula che ti fè sveltu a imparà

 

una puesia d’ una volta, mia a culùr ma in bianch e negar

che mia tüti hin bon da légg chi l’è camuff e chi l’è  alegar

 

nè sustansiusa nè mudesta un po’ liscià un po’ rüghénta

nè trop giascià a temperatüra ambient, da sicür mia sbruiénta

 

un po’ büsarda e un po’ canaja e di volti fin trop sincera

prufümà ‘mè un filon da pan che al düra fin a sera

 

grisa cume al duvria véss un nuembar un po’ nebiùs

cargà da dulsa nustalgia, ‘mè i ricord alegar e dulurùs

 

legéra ‘mè ‘na falüspa da paia ch’ la vula int la turmenta

sensa pretesi da véss bèla a la sveltina ma anca lenta

 

una puesia che ‘nt i so rimi la ricorda la mè Nuara

al so dialèt e la so gent, generusa e mai avara

 

una squadra e la so maja cunt un balòn da pià a piscià

un culùr ‘mè cul dal cél da restà fin a-stracüntà

 

‘dèss che certa brüta gent lè turnà dentar la fogna

se i duvissan fas véd ancura i a niguma dent l’Agogna

 

 e al nuares, i la savuma, al g’ha lunga la memoria

e sta brüta e spurca storia la resista int la memoria

 

parchè al cör al pica fort quand al veda stu culùr

ch’ al fa viscà una lampadina alimentà dal nostr’ amùr  

 

e ‘dèss che ‘l magòn al riva e ‘l trova pü ‘na via d’uscita*

Nonnopipo av dà un basìn e … “forsa Nuara tüta la vita”.

 

Nonnopipo

*Licenza poetica esatto sarebbe “surtì”

Continua a leggere

Dialetto

Grassie (quasi) a tüti

Published

on

Non traduco mai in italiano le mie poesie dialettali, ma questa volta faccio un’ eccezione affinché possa arrivare a tutti in modo chiaro, ad alcuni farà piacere ad altri forse no. Non si può piacere a tutti.

 

L’è una storia un po’ trop lunga par cüntala in puesia

ma una rima dréra l’altra, pü nissün la porta via.

L’era dré rivà l’autün, incertèssi e delüsion

parchè una maniga ‘d balurd l’è büsgà al nost balòn

Sensa pietà nè sentiment, al püssè unèst l’è un disgrassià

da mis-ciai insèma al rüt, in mèss d’un camp a cuncimà.

Ma lassuma sta sta gent, se de no am végn da tra sü

che a mètagh i man indoss ti a tirarji via pü

La memoria i la san tüti, g’ ha un’ inissi e mai una fin

e da sti quatar carugnon, is ricurdaràn anca i fiulin

Scüsim la sfogu anca parchè, custi chi hin dì da festa

scancelarò sti piöcc dal lüff, che im viundan par la testa

par fa dal post a un brav om, che cun curagg e cun ardùr

l’è pruvà a restitüì a tüti, dignità speransa e unùr

e dal Nuara a l’ha dimustrà, al sarà sempar al prim murus

e mi i speri che prestu o tardi, al diventarà anca al so spus

cul ch’ l’è fai al Sciur Ferranti, s’ ha infilà dentar la storia

e Nuara e i nuares tantu lunga g’ han la memoria

e par mia dismentigà al Di Bari, un pensier al diretur

che curénda dréra al temp, l’è creà un capulavur

grassie ai magaté, e un quai vigiot ch’ l’è rifilà un quai pé ‘nt al cü

in sta categuria vuncia e scarusa, igh turnuma propi pü

grassie anca al Marchionni, ch’ l’è pià in man sta caruana

e l’è fai da parafülmin a püssè d’ una scalmana.

grassie a tüta cula gent, che l’è sgübà dür par al Nuara

gent che ‘nt’al cör la purtarà, al ricord d’ un’alba ciara

grassie propi a tüti quanti, dai distinti a la tribüna

anca a tüti i criticòn che i na perdunan mia vüna 

E s’ l’è vera che da sempar, i migliur i stan in fund

un grassie ai NUARES, un grassie gross cume l’è ‘l mund

 

Nonnopipo

 

 

È una storia un po’ troppo lunga per raccontarla in poesia

ma una rima dietro l’ altra, più nessuno la porta via

Stava arrivando l’autunno, incertezze e delusioni

perchè un gruppo di gente senza scrupoli ha bucato il nostro pallone (metafora)

Senza pietà nè sentimento, il più onesto è un disgraziato

andrebbero mischiati insieme al letame, in mezzo a un campo a concimare

Ma lasciamo stare sta gente, se no mi viene da vomitare

che a mettergli le mani addosso non le tireresti via più

La memoria lo sanno tutti, ha un inizio e mai una fine

e di questi quattro carognoni, si ricorderanno anche i bambini

Scusatemi lo sfogo anche perchè questi sono giorni di festa

cancellerò questi pidocchi del lupo*, che mi girano per la testa

per far posto a un bravo uomo, che con coraggio e con ardore

ha provato a restituire a tutti, dignità speranza e onore

e del Novara lo ha dimostrato, sarà sempre il primo fidanzato

e io spero che presto o tardi diventerà anche il suo sposo

quello che ha fatto il Signor Ferranti, si è infilato dentro la storia

e Novara e i novaresi assai lunga hanno la memoria

e per non dimenticare il Di Bari, un pensiero al direttore

il quale correndo dietro al tempo, ha creato un capolavoro

grazie ai giovani giocatori e a qualche vecchietto che a loro avrà rifilato qualche scarpata nel culo

in questa categoria unta e sporcacciona (a qualcuno non piacerà questo termine, pazienza!) non torneremo proprio più

grazie anche a Marchionni che ha preso per mano questa carovana

e ha fatto da parafulmine a più di un fulmine

grazie a tutta quella gente che ha lavorato duro per il Novara

gente che nel cuore porterà il ricordo di un’ alba chiara

grazie proprio a tutti quanti dai distinti alla tribuna

anche a tutti i criticoni che non ne perdonano mai una

E se è vero che da sempre, i migliori stanno in fondo

un grazie ai NUARES, un grazie grosso come il mondo.

 

Nonnopipo

*semi di cespuglio di bosco a doppia punta, particolarmente odiosi, che si attaccano ai vestiti

Continua a leggere

NSN on Facebook

Facebook Pagelike Widget

Telegram

Ultimi Articoli

Copyright © 2017 Zox News Theme. Theme by MVP Themes, powered by WordPress.

%d blogger hanno fatto clic su Mi Piace per questo: