Rimaniamo in contatto

Dialetto

Blog augüri da bon Nadal

Published

on

Suta un ciel ch’al sa da guèra da rassismo e suferensa,
fasuma l’albero pö ‘l presepi in mèss un mar d’ indifferensa

sfularmà mè i can da cacia quand i nasan ben l’udúr,
a ghè nissüna diferensa tra la belva e ‘l dumatur,

tüti dentar la stessa gabbia a lutá par la supravivensa
sempar prunt a girà la facia e spügà una quai sentensa.

I purtuma indoss di vistì cüsì cunt al fil dl’ ignuransa
pö cercuma i fassulètt quand as piangia in abundansa.

Però dess a ghè ‘l Nadal e is sentuma tüti püssè bon,
e inveci cul che püssè interessa l’è mangià mè di gurdiòn.

“Tanti augüri a lü e famiglia, ch’ am salüda la so sciura!!!”
-si, l’è cul ch’ al sta al quint pian, e la so dona l’è impustura-

“Quantu temp che it vedi mia, son cuntent da brasciàt sü ”
-A m’ha sempar stai süi bali, ma ch’al vaga a da via ‘l cü!!”-

Suma fals ‘mè na banconota dal valur da quindas euro,
e la sciarvèla in cunfüsión da ricuverala in Neuro!!

I püssè timurús da Diu i vann a messa a mesanott,
ma pena fora dl’ üss dla gésa is ricordan pü na gott.

Pö van ca, i pìcan la dona, una scarpá ‘n tal cü ai fiulín,
intant che cun la facia suridenta i düerdan i pachetìn.

Si la só ho fai una menda, “na got” la disan i milanes,
ma sant’ Ambrös che l’era Vescuv l’era amis di nuares!!

Ma adèss l’è temp d’augüri, manca poch a la scadensa,
se im dismentighi un quai vün i pagaró la penitensa.

Bon Nadal a tütt al mund, bon Nadal al mè Nuara,
bon Nadal a cula maia che par nün l’è tantu cara.

Bon Nadal a la Societá, dal President, fin ai magasiné
cunt la speransa che a genár as cacia fora un quai dané.

Bon Nadal al Sciur Corini, ch’ l’è brescian da rassa püra
schena drita e facia int l’aria sensa tèma nè paüra.

Bon Nadal ai scapà da cà che ‘nt al cör i gh hann Nuara
una lacrima da nustalgia la scülga via pressiusa e rara

Bon nadal a l’ Alcarotti, grüpp da storia e sentiment
bon Nadal a chi ‘s fa ‘l cü par fa sta insema al Cuurdinament …

… ma una vuss putenta e forta sensa tropi resistensi
sü dla cürva la rampega fin rivá a scavá i cuscensi …

… e se ti sforsi un po’ l’urègia sensa avegh tropi pretest,
ti sentirè vusá ‘l Carlon : “arbitro bastard e disunèst”!!

E adèss che suma in fund e alsi i öcc e guardi indrera,
bon Nadal a “Novara siamo noi” e finissi chí sta tiritera.

Ma prima che tra al bö e l’asinèll al vegna al mund al Gesü Bambín
Nonnopipo av fa i augüri, una caressa e av dá un basín.

Bon Nadal a tüti

Forsa Nuara tüta la vita

Nonnopipo

Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Continua a leggere
Clicca per commentare

Lascia un commento

Dialetto

Il prossimo acquisto di Lo Monaco: La Paniscia.

Published

on

La vegna ndi cassini e l’è un piat dla povra gént, l’è ‘l ricord d’una vita grama quand sül tavul gh’ era gnent.

 E quand la nebbia, vèrs Nuembar, l’era grisa ‘mè la fam, e un purscé, che tacá sü al serviva a fa i salam

 as capiva a la sveltina e sensa tèma da sbaglià, che al temp da fa la paniscia uramai l’era rivà.

‘S cuminciava tri dì prima cun la verša già brinà, ‘s bütava dentar i fasö, un po’ intér un po’ schiscià

 ‘s faseva bùi un po’ da cuji, un toch d’oss bèl divussiùs, e al brod, dasiot dasiot, al cuminciava a gni mustùs.

 Un para d’uri i bastavan mia, agh na vüreva cinq o sés, e se gh’ era mia temp … as saràva un öcc … va ben l’istéss!

 Pö ‘s ciapava un bell cudrö che s’ üsava fai da ram, e ‘s tirava fó dla duja ‘na fidighina e un bèl salam.

 Sül tajér* as pistava al lard e fina ‘s triava ‘na carota, un po’ ‘d sèlar, una scigula fin a quand ‘al cüdrö a scota,

 Quand al bütér a sfrigulava e al ris al gnéva ben tustà, s’ argiungeva ‘na buta da Spana a föch alégar par sügà.

 Pö l’era ura, sensa prèssa, da purtà a cutüra al ris, dasi dasi cun passiensa par mia fà di gran pastìs.

 Un quart d’ ura … vint minüt, trusà ben e cun curagg!!! manca dess numà una roba: una gratada da furmagg!!!

 Pö un toch da cul bütèr che ‘l fadiga a slenguà, as trusava ben … sensa paüra, pö ‘s lassava ripusà.

 Un öcc al tàvul … l’è tüt a post … anca al vin al manca mia, e tüti insèma ‘s mangiava la paniscia che a Nuara l’è puesia!

 Uramai l’è un bot e mèss e a l’Alcarott giöga ‘l Nuara, ‘s branca in man la biciclèta a chi riva prima ‘s fa la gara,

 Sarà ‘l vin in abundansa e tri piatt da cul risòt che sü i ass da legn dla cürva as finiva a fà a cassót.

 Tüti bulà ‘mè un pach pustal e sgarblà ‘mè ‘na saràca, Ma da vusá “forsa Nuara” la nostra vus l’ era mai straca.

 E l’è cun grassia e curtesia mis-cià bén cunt al rispèt che un cunsili al Sciur Lo Monaco igh la dò in dialèt:

“se ti vöri diventà un cicinin un po’ Nuarés da paniscia ti devi mangiàn, mia un piàt ma cinq o sés”

 

Nonnopipo

*licenza poetica, piú correto sarebbe “pistalard”

Continua a leggere

Dialetto

Un’ amica che non c’è più

Published

on

L’ ho cunussü tanti ani fa drera i ültim palassion
fin dua l’ ariva lüminusa e frèda la campagna
renta i foss, urmai bèi süc da fin stagion
rasént a tèra, bassa bassa la ristagna

misteriusa cume ‘l vél d’una dona in gesa
absentà* ‘mè ‘l faseva al magu dla Bicoca
suta un sul a-spurch dla facia smorta e ufesa
as tacàva giò par tèra ‘mè un fiulin tacà la soca

dasi dasi la gneva ‘vanti sempar seria e silensiusa
la rabaiava tüt cul ch’ la truava in sü la stra,
la pareva vèss una gran dama tenebrusa e dispetusa
‘mè ‘na fiulina che gh ha voia da giügà

as lassava drera un paesàg da sögn
spess ‘mè ‘n mür, dulz ‘mè ‘na puesia
che ti la légi quand al cör agh n’ ha bisogn
che dai so rimi ti vurissi pü ‘ndа via

e quand par man t’im cumpagnavi a scola
i calson cört e la narigia giö dal nas
‘nti scarpi strenci fai da curàm la sòla
da s-ciarà gnenta i s’eri fina persüas

t’ ho sempar vurü ben cume ‘n’ amisa
anca dèss che ti t fè ved pü gnent dal tüt
e se Nuara la to presensa la renda grisa
i rimpiangi cui mument anca se brüt

cume quand a l’Alcarotti ti ‘scundevi San Gaudensi
e ti rivavi dal Valentino scavalcanda ‘l mür
e par ved un toch dla partida as faseva penitensi
che a quatr’ uri dla bassura ti fasevi gni giò scür

adess sensa da ti i giurnai in bèli e lüminusi
anca se i patissi un po’ la tö mancansa
che a füria da scargà in ciel robi scarusi
da gris duarji sbianchì tüta la stansa

l’è tantu temp che urmai s’ancuntruma mia
partend da Vévar par rivà fin a Pernà
un po’ da trüch un po’ da cipria e cusì sia
t’ sè diventà ‘na sciura liganta e riservà

e quand cul dì che prima o pö par tüti al rivarà
se ti vöri fam un regal cun grassia e curtesia
vegna giò ancù ‘na volta sü la mè cità,
vegna giò ancura a fam un po’ da cumpagnia.

Nonnopipo

* scomparso nel nulla

Continua a leggere

Dialetto

Al mercà

Published

on

Vöri scrif una bèla cuntula par al nostar Diretur

da purtas drèra al mercà quand al cumpra i giügadùr

 

l’avrà marcà cus l’è ch’a serva par mia fa la fin dal lifròch

basta légg i indicassiòn e ti sè già avanti d’un bèl toch.

 

Al purtiér l’è l’ünich ruolo che ’nt al temp l’è mai cambià,

giò la in fund tüt d’im-par-lü al pensà madumà a parà

 

I difensur in mèss a l’area dess i a ciaman “i centrali”

una volta “liber e stopper” sensa cacià insì tanti bali

 

Dü tersin vegia manera e un median che al magnulava

cume al Rocca da Castrovillari che i aversari i a impicava

 

Un’ala svigia a saltà l’oman cume al faseva al Gavinèl

sü la destra l’era una schegia e a guardal l’era fin bèl

 

Pò agh vöra un ragiunàt, fursi un geometra però l’è méj

vün ch’al giöga tanti balón quant’in testa agh n’ha ‘d cavéji

 

Sü!! truvuma un “triquartista” vün da cui cunt i pé bon

cume al Lüisìn Giannini che süi pé at meteva al balòn

 

dess a manca chi ‘l fa i gol, un lipagiòn bèl grand e gross

vün che tüti i difensur, manumà a pensàgh is cagan doss

 

vün cun al cör dal Pinamonte generùs ‘mè una dacquadura

Fabio Enzo, Jacomuzzi, al Ricu Bramati e tanti àltar ancura

 

Una panchina digurdì cun tri o quatar giuvnutèl

una brancà da “senatur” da spedì in camp sül püssè bèl

 

‘dèss parluma dal padròn, cul Giügastròn d’ un milanés

ch al venda püra a chi ch’ al vöra magari anca a un giargianés

 

ma ch’as la cacia ben in testa e ch’as na faga una rasòn

che s’ al fa ‘na quai vacàda igh curùma dré cunt al furcòn

 

Già ch’ i son dré a scriv tre rimi, senssa pretesi e senssa boria

végnan in mént i tri delinquent ch’ i hin scrivü la fin dla nostra storia

 

i riporti mia i so tri nom parchè im fan gni vojia da tra sü

i preghi però al Giügastròn da fa che sta storia as ripéta pü

 

e “giügastròn”, car al mè Ferranti, l’è una una dulsa definission

riservà cun simpatia a chi par giügà l’è purtà drera al balòn

 

Un pensér cun tanta speranssa e un augüri a l’ alenadùr

avégal chì sü la nostra panca sti tranquil l’é un grand unùr

 

‘Dèss tiri via al distürb e i cùri a fa anca st’ ann l’abunament

sperand che l’”emiro” Altamimi am farà mia ciapà un quai spuvént.

 

Nonnopipo

Continua a leggere

NSN on Facebook

Facebook Pagelike Widget

Telegram

Ultimi Articoli

Copyright © 2017 Zox News Theme. Theme by MVP Themes, powered by WordPress.