Paniscia azzurra Dialetto

La vegna ndi cassini e l’è un piatt dla povra gent,
l’è ‘l ricord d’una vita grama quand sül tavul gh’ era gnent.

E quand la nebbia, vèrs Nuembar, l’era grisa ‘mè la fam,
e un purscé, che tacá sü al serviva a fa i salam,

as capiva a la sveltina e sensa tèma da sbaglià,
che al temp da fa la paniscia uramai l’era rivá.

‘S cuminciava tri dí prima cun la versa giá briná,
‘s bütava dentar i fasö, un po’ intér un po’ schisciá,

‘s faseva búi un po’ ‘d cuij, un toch d’oss bel divussius,
e al brod, dasi dasi, al cuminciava a gni mustús.

Un para d’uri i bastavan mia, agh na vüreva cinq o sés,
e se gh’ era mia temp…as saráva un occ….va ben l’istéss!

Pö ‘s ciapava un bell cudrö che s’ üsava fai ad ram,
e ‘s tirava fó dla duja ‘na fidighina e un bel salam.

Sül tajé* ‘s pistava al lard e fina ‘s triava ‘na carota,
un po’ ‘d sèlar, una scigula fin a quand ‘l cudrö a scota,

Quand al büter a sfrigulava e al ris l’ era ben tustá,
s’ argiungeva ‘na buta ‘d Spana a föch alégar da sügá.

Pö l’era ura, dasi dasi, da purtá a cutüra al ris,
sensa prèssa cun passiensa par mia fà di gran pastís.

Un quart d’ ura…vint minüt, trusá ben e cun curagg!!!
manca dess numá una roba: una gratada da furmagg!!!

Pö un toch da cul büter che ‘l fadiga a slenguá,
‘S trusava ben……sensa paüra, pö ‘s lassava ripusá.

Un öcc al tavul…l’è tüt a post…anca al vin al manca mia,
e tüti insèma ‘s mangiava la paniscia che a Nuara l’è puesia!

Uramai l’è un bott e mèss e a l’Alcarott giöga ‘l Nuara,
‘s brunca in man la biciclèta a chi riva prima ‘s fa la gara,

Sará ‘l vin in abundansa e tri piatt da cul risòt
che sü i ass da legn dla cürva as finissa a fà a cassót.

Tüti bulà ‘mè un pumpudógn e sgarblà ‘mè ‘na saráca,
Ma da vusá “forsa Nuara” nostra la vus sarà mai straca.

 

Forsa Nuara tüta la vita

Nonnopipo

*licenza poetica, piú correto sarebbe “pistalard”


Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Lascia un commento

%d blogger hanno fatto clic su Mi Piace per questo: