Un’amisa che l’è pù insèma a nün Dialetto

T’ ho cunussü tanti ani fa drera i ültim palassion,
fin dua l’ ariva lüminusa e frèda la campagna,
renta i foss, urmai bèi süc dla fin stagion,
rasént a tèra, bassa bassa la ristagna.

Misteriusa cume ‘l vél d’una dona in gesa,
absentà* ‘mè ‘l faseva al magu dla Bicoca
suta un sul spurch, dla facia smorta e ufesa,
as tacáva gió par tèra ‘mè un fiulin tacá la soca.

Dasi dasi la gneva ‘vanti sempar seria e silensiusa,
la rabáiava tütt cul ch’ la truava in sü la stra,
la pareva véss una gran dama tenebrusa e dispetusa,
‘mè ‘na fiulina che g’ ha voia da giügá.

As lassava drera un paesagg da sògn,
spess ‘mè ‘n mür, duls ‘mè ‘na puesia,
che ti la leggi quand al cör agh n’ ha bisogn,
che dai só rimi ti vurissi pü ‘ndà via.

E quand par man t’im cumpagnavi a scola,
i calson cört e la narigia gió dal nas,
‘nti scarpi strèti fai da curám la sòla,
da s-ciará gnenta i s’eri fina persüas.

T’ ho sempar vurü ben cumè ‘n’ amisa
anca dess che ti t fè ved pü gnent dal tütt,
e se Nuara la to presensa la renda grisa
i rimpiangi cui mument anca se brütt.

Cume quand a dl’Alcarotti ti ‘scundevi San Gaudensi
e ti rivavi dal Valentino scavalcand al mür
e par ved un toch dla partida as faseva i penitensi
parchè a quattr’ uri dla bassura ti fasevi gni gió scür

Adess sensa da ti i giurnai in bèli e lüminusi,
anca se patisi un po’ la tó mancansa
che a füria da scargá in ciel robi scarusi
da gris duaró sbianchí tüta la stansa.

L’è tantu temp che urmai s’ancuntruma mia
partend da Vèvar par rivá fin a Pernà.
un po’ da trüch un po’ da cipria e cusí sia,
t’ sè diventá ‘na sciura liganta e riservá,

E quand cul dí che prima o pö par tüti al rivará
se ti vöri fam un regal cun grassia e curtesia,
vegna gió ancú ‘na volta sü la mè citá,
vegna gió ancura a fam un po’ ‘d cumpagnia.

Nonnopipo

* scomparso nel nulla


Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Lascia un commento

%d blogger hanno fatto clic su Mi Piace per questo: