Rimaniamo in contatto

Dialetto

Cichìn

Published

on

Quanti persunagg hin passá süi scalin dl’ Alcarotti!!!
Sciur, povar, bei, brütt, tanta gent che spetava madumá la dumenica bassura par fa la fila ai buteghín, piá in man al bigliètt e setás süi scalin dla cürva,
Indavan ben tüti e dó : cula dal mèrcà e cula dal Valentin, gh’ era mia differensa, mia cume incö!
Pö pena i giügadur i rivavan in camp dopu vess passá da suta la tribüna, cunt una tramenta scatula da Pavesini in man, alè!!! tüti in pè, e un quai vün cunt i man tacá la rét giamó bèli prunt a dagh un quai sarculón.
Ma tra tüta sta bèla gent, inamurá dal Nuara, a gh’ era un umètt che ‘s ciamava…

Al só nom l’era Francesco, ma par tüti l’era ‘l Cichìn,
al cuminciava a bev a vott uri e a mèssdì l’era già pin.

Al rivava in bicicleta tütt fai sü in t’un mantell,
l’era negar mè la nott e a guardal l’era fin bell.

Un capè cacià sü in testa che al purtava da travers,
suta al sul o in mess dla fioca sensa gnanca fá un vers.

Al rivava dla cassina…dal Margat…la facia scüra,
e ‘ncuntral tra ‘l ciar e scür al meteva un po’ paüra.

Mansulè da prufession, lung e magar mè ‘na lüsèrta,
se ‘l parlava dal Nuara s’ascultava a buca vèrta.

Al bütava suta al nas i figürini di campion,
e ‘l diseva che dal Piola l’era stai un grand amisón.

Al cüntava tanti storij…da sicür un po’ inventà,
el dì a dréra, dopu ‘na cioca si era già dismentigà.

Peró l’era un persunagg, fai un po’ a la sò manera,
e se smeava un po’ cattiv a dipendeva dal barbera!!!

Semp in gir cunt la tracòla süi panchini a bamblanà
fin a quand vers mesanott l’era ura d’ andà a cà!

Ma la strà, porcu sciampin, sensa luce e piena ‘d böcc,
e bell pien cumè ‘na lüm a l’ubbligava a slargà i öcc.

E una sera che piuveva e la gneva gió a sidlái,
tüti i aršin di risèri l’è finí par misürai.

Tütt bulà mè ‘n pacch pustal, e i ginöcc tüti sgarblà,
in bicicleta a l’Alcarotti ‘s preparava andà a vusà,

Un po’ intrégh cumè ‘n trabüch al pedalava da gran lena
parchè i ani e un quai dulur gh’ ingimbavan gió la schena.

Legà ben la bicicleta, che ghè in gir tanti mandiàn,
una carafa al bar Benevul la pudeva mia fa dann.

Gió lá in fund tacà la ret al vusava “forsa Piola”
che a Nuara al giugava qund lü ‘ndava ancura a scola….

…..che par lü a s’ha fermà a la tersa elementar!!!!!
e tüti i anni ch’ l’è perdü ja recüperava al bar.

Lü da fulbar al capiva…gnent dal tütt…o bèli gnenta…..
ma se i sforsi un po’ l’urègia “forsa Piola” ancur as senta!!!!!

Forsa Nuara tüta la vita

Nonnopipo

Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Continua a leggere
Clicca per commentare

Lascia un commento

Dialetto

Il prossimo acquisto di Lo Monaco: La Paniscia.

Published

on

La vegna ndi cassini e l’è un piat dla povra gént, l’è ‘l ricord d’una vita grama quand sül tavul gh’ era gnent.

 E quand la nebbia, vèrs Nuembar, l’era grisa ‘mè la fam, e un purscé, che tacá sü al serviva a fa i salam

 as capiva a la sveltina e sensa tèma da sbaglià, che al temp da fa la paniscia uramai l’era rivà.

‘S cuminciava tri dì prima cun la verša già brinà, ‘s bütava dentar i fasö, un po’ intér un po’ schiscià

 ‘s faseva bùi un po’ da cuji, un toch d’oss bèl divussiùs, e al brod, dasiot dasiot, al cuminciava a gni mustùs.

 Un para d’uri i bastavan mia, agh na vüreva cinq o sés, e se gh’ era mia temp … as saràva un öcc … va ben l’istéss!

 Pö ‘s ciapava un bell cudrö che s’ üsava fai da ram, e ‘s tirava fó dla duja ‘na fidighina e un bèl salam.

 Sül tajér* as pistava al lard e fina ‘s triava ‘na carota, un po’ ‘d sèlar, una scigula fin a quand ‘al cüdrö a scota,

 Quand al bütér a sfrigulava e al ris al gnéva ben tustà, s’ argiungeva ‘na buta da Spana a föch alégar par sügà.

 Pö l’era ura, sensa prèssa, da purtà a cutüra al ris, dasi dasi cun passiensa par mia fà di gran pastìs.

 Un quart d’ ura … vint minüt, trusà ben e cun curagg!!! manca dess numà una roba: una gratada da furmagg!!!

 Pö un toch da cul bütèr che ‘l fadiga a slenguà, as trusava ben … sensa paüra, pö ‘s lassava ripusà.

 Un öcc al tàvul … l’è tüt a post … anca al vin al manca mia, e tüti insèma ‘s mangiava la paniscia che a Nuara l’è puesia!

 Uramai l’è un bot e mèss e a l’Alcarott giöga ‘l Nuara, ‘s branca in man la biciclèta a chi riva prima ‘s fa la gara,

 Sarà ‘l vin in abundansa e tri piatt da cul risòt che sü i ass da legn dla cürva as finiva a fà a cassót.

 Tüti bulà ‘mè un pach pustal e sgarblà ‘mè ‘na saràca, Ma da vusá “forsa Nuara” la nostra vus l’ era mai straca.

 E l’è cun grassia e curtesia mis-cià bén cunt al rispèt che un cunsili al Sciur Lo Monaco igh la dò in dialèt:

“se ti vöri diventà un cicinin un po’ Nuarés da paniscia ti devi mangiàn, mia un piàt ma cinq o sés”

 

Nonnopipo

*licenza poetica, piú correto sarebbe “pistalard”

Continua a leggere

Dialetto

Un’ amica che non c’è più

Published

on

L’ ho cunussü tanti ani fa drera i ültim palassion
fin dua l’ ariva lüminusa e frèda la campagna
renta i foss, urmai bèi süc da fin stagion
rasént a tèra, bassa bassa la ristagna

misteriusa cume ‘l vél d’una dona in gesa
absentà* ‘mè ‘l faseva al magu dla Bicoca
suta un sul a-spurch dla facia smorta e ufesa
as tacàva giò par tèra ‘mè un fiulin tacà la soca

dasi dasi la gneva ‘vanti sempar seria e silensiusa
la rabaiava tüt cul ch’ la truava in sü la stra,
la pareva vèss una gran dama tenebrusa e dispetusa
‘mè ‘na fiulina che gh ha voia da giügà

as lassava drera un paesàg da sögn
spess ‘mè ‘n mür, dulz ‘mè ‘na puesia
che ti la légi quand al cör agh n’ ha bisogn
che dai so rimi ti vurissi pü ‘ndа via

e quand par man t’im cumpagnavi a scola
i calson cört e la narigia giö dal nas
‘nti scarpi strenci fai da curàm la sòla
da s-ciarà gnenta i s’eri fina persüas

t’ ho sempar vurü ben cume ‘n’ amisa
anca dèss che ti t fè ved pü gnent dal tüt
e se Nuara la to presensa la renda grisa
i rimpiangi cui mument anca se brüt

cume quand a l’Alcarotti ti ‘scundevi San Gaudensi
e ti rivavi dal Valentino scavalcanda ‘l mür
e par ved un toch dla partida as faseva penitensi
che a quatr’ uri dla bassura ti fasevi gni giò scür

adess sensa da ti i giurnai in bèli e lüminusi
anca se i patissi un po’ la tö mancansa
che a füria da scargà in ciel robi scarusi
da gris duarji sbianchì tüta la stansa

l’è tantu temp che urmai s’ancuntruma mia
partend da Vévar par rivà fin a Pernà
un po’ da trüch un po’ da cipria e cusì sia
t’ sè diventà ‘na sciura liganta e riservà

e quand cul dì che prima o pö par tüti al rivarà
se ti vöri fam un regal cun grassia e curtesia
vegna giò ancù ‘na volta sü la mè cità,
vegna giò ancura a fam un po’ da cumpagnia.

Nonnopipo

* scomparso nel nulla

Continua a leggere

Dialetto

Al mercà

Published

on

Vöri scrif una bèla cuntula par al nostar Diretur

da purtas drèra al mercà quand al cumpra i giügadùr

 

l’avrà marcà cus l’è ch’a serva par mia fa la fin dal lifròch

basta légg i indicassiòn e ti sè già avanti d’un bèl toch.

 

Al purtiér l’è l’ünich ruolo che ’nt al temp l’è mai cambià,

giò la in fund tüt d’im-par-lü al pensà madumà a parà

 

I difensur in mèss a l’area dess i a ciaman “i centrali”

una volta “liber e stopper” sensa cacià insì tanti bali

 

Dü tersin vegia manera e un median che al magnulava

cume al Rocca da Castrovillari che i aversari i a impicava

 

Un’ala svigia a saltà l’oman cume al faseva al Gavinèl

sü la destra l’era una schegia e a guardal l’era fin bèl

 

Pò agh vöra un ragiunàt, fursi un geometra però l’è méj

vün ch’al giöga tanti balón quant’in testa agh n’ha ‘d cavéji

 

Sü!! truvuma un “triquartista” vün da cui cunt i pé bon

cume al Lüisìn Giannini che süi pé at meteva al balòn

 

dess a manca chi ‘l fa i gol, un lipagiòn bèl grand e gross

vün che tüti i difensur, manumà a pensàgh is cagan doss

 

vün cun al cör dal Pinamonte generùs ‘mè una dacquadura

Fabio Enzo, Jacomuzzi, al Ricu Bramati e tanti àltar ancura

 

Una panchina digurdì cun tri o quatar giuvnutèl

una brancà da “senatur” da spedì in camp sül püssè bèl

 

‘dèss parluma dal padròn, cul Giügastròn d’ un milanés

ch al venda püra a chi ch’ al vöra magari anca a un giargianés

 

ma ch’as la cacia ben in testa e ch’as na faga una rasòn

che s’ al fa ‘na quai vacàda igh curùma dré cunt al furcòn

 

Già ch’ i son dré a scriv tre rimi, senssa pretesi e senssa boria

végnan in mént i tri delinquent ch’ i hin scrivü la fin dla nostra storia

 

i riporti mia i so tri nom parchè im fan gni vojia da tra sü

i preghi però al Giügastròn da fa che sta storia as ripéta pü

 

e “giügastròn”, car al mè Ferranti, l’è una una dulsa definission

riservà cun simpatia a chi par giügà l’è purtà drera al balòn

 

Un pensér cun tanta speranssa e un augüri a l’ alenadùr

avégal chì sü la nostra panca sti tranquil l’é un grand unùr

 

‘Dèss tiri via al distürb e i cùri a fa anca st’ ann l’abunament

sperand che l’”emiro” Altamimi am farà mia ciapà un quai spuvént.

 

Nonnopipo

Continua a leggere

NSN on Facebook

Facebook Pagelike Widget

Telegram

Ultimi Articoli

Copyright © 2017 Zox News Theme. Theme by MVP Themes, powered by WordPress.