Rimaniamo in contatto

Dialetto

…al nost amur par al Nuara al dürará un eternitá.

Published

on

Quanti vòlti la matina t’ it disvégi e ‘nt la testa gira un quai cus che ti sè mia bon da ricurdá par inter. Al deva véss a stai un bell sògn alegar peró, vün da cui che ‘t lassan una sensassion da legeressa.
Si si, t’ sè fai un sògn; ma lü al giöga a scundalevra e na vöra mia savé da fass ved.
Ta smea d’ avegal li sü la punta dla memoria, ma pö, vigliaca logia, ta scapa via e gnent dal tütt, sa smorsa la lampadina e ti resti al scür.
Pö capita che quand ti sè drè a fa un quai cus, una qualsiasi roba…trach!!!, in t’un mument a sa s-ciarissa l’interno dla sciüca, cusí, tütt d’un culp, impruvvisament,
e tütt a diventa ciar ‘mè l’acqua ‘d funtana, ti pudarissi sta li tre uri da fila a ricurdá ogni particular dal sògn: da cui püssè impurtant fin rivá a inquadrà i fargüi che la memoria l’ è lassá indré.
E alura la va a finí che se t’ it trovi in mèss dla gent o in t’un negossi o in ufissi drè una scrivania, ti sè in viá che ti fè la figüra dal rimbambì, parchè ti ridi cuntent cume un purscèl impaltá, cunt una faccia un po’ da stüpid, da sicür un po’ da scemu.
Ecco, adess i ricord is fann un po’ ‘nibbiá…ma parchè am vegna la pèll d’oca e un grup in gula che as trasfurma sveltu ‘mè ‘l fülmin in t’ un magón che, sensa visá nissün, al duerda ‘l rübinètt di lacrimi?
E alura tütt al mund al pensará che at manca ‘na quai rudèla e che ti sè mia tantu a post, un tuanaga, un lifróch, insuma: vün matt ‘mè un sold stampá in prèssa.
Peró lur i sann mia che ti sè dre a ricurdá…

Int la mè testa ghè la nèbbia o l’è la mè immaginassion ?
fora ‘l temp al passa sveltu e ‘s tira drera anca i stagion.

Son setá süi mè scalin, in mèss dla gent tanti anni fa…..
….im guardi in gir…”chi l’ è chi si??”…i son fin a stracüntá!!

Suspètus i stréngi i öcc, e ma smea…si…ma smea da cunuss,
se propi…propi mia la facia…furse…almenu una quai vuss.

Ma si!! L’è cul fiulott, cul che ‘l vusava sempar ‘mè ‘n strascé,
al bestemmiava tacá l’arbitro e a pügn sará s’alsava in pé.

Oh Signur!! ‘mè l’è cambiá!!! l’è diventá insí tantu vegg??
ma a guardass in gir fai ben a ghè chi peró sta anca pegg!!

Adess im volti par indré e i öcc i rivan fin la int l’ aria,
ma l’è lü cul brav umètt cun la ghigna dulsa e bunaria?

l’era giuin…süi trent’ ani, quand al gneva a l’ Alcarott,
ma pürtropp i settant’ ani hin rivá in cinq e tri vott!!

In cul grüpètt, in pé a destra ghè in mess un bèll fiulin,
si…adèss im na nacorgi…son propi mi da picinin…

…al mè siu Mario, al mè pa Gino, al Gügia, al Lisca, al Culunèll.
inséma a lur lá in mèss dla cürva, guardai l’è ancura püssè bell.

Cul pruverbi al disa che, se in testa ti gh è i cavéi russ,
che to Pa, o prima o dopu, ti la sbati gió ‘n tal puss.

Par furtüna l’è mia vera e cul fiulón ch’ l’ è li setá,
as capissa di cavéi che visín al gh ha só Pa.

A ghè tri generassion a tifá par al Nuara,
Nonu, papá e i nivud che a vusá i fann la gara.

Dl’ Alcarotti as riva al Piola in un viagg dentar la storia,
e pö as passa da travers sempar sül fil dla memoria.

Cun al cör ch’ al pica fort quand al veda sti culúr,
al fa viscá la lampadina alimentá dal nostr’ amur.

Dés, vint, trenta, cinquant’ ani, int un fiá hin passá via,
chi l’è viv e chi gh l’ è pü, chi a scriva una puesia…

…sul ‘na roba l’è sicüra, senssa tèma da sbagliá…
…al nost amur par al Nuara al dürará un eternitá.

Forsa Nuara tüta la vita

Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Continua a leggere
Clicca per commentare

Lascia un commento

Dialetto

L’ ültima nèbia

Published

on

T’ ho cunussù tanti ani fa drera i ültim palassiòn,
fin duva l’ ariva lüminusa e frèda la campagna,
renta i foss, urmai bèi süc dla fin stagiòn,
rasént a tèra, bassa bassa la ristagna.

Misteriusa cume ‘l vél d’una dona in gésa,
absentа* ‘mè ‘l faseva al magu dla Bicoca
suta un sul a- spurch, dla facia smorta e ufésa,
as tacava giò par tèra ‘mè un fiulin tacà la soca.

Dasi dasi la gneva ‘vanti sempar seria e silensiusa,
la rabaiava tüt cul ch’ la truava in sü la stra,
la pareva véss una gran dama tenebrusa e dispetusa,
‘mè ‘na fiulina che g’ ha voja alégra da giügà.

As lassava drera un paesagg da sògn,
spess ‘mè ‘n mür, duls ‘mè ‘na puesia,
che ti la leggi quand al cör agh n’ ha bisogn,
che dai sò rimi ti vurissi pü ‘ndа via.

E quand par man t’im cumpagnavi a scola,
i calson cört e la narigia giò dal nas,
‘nti scarpi strèti fai da curàm la sòla,
da s-ciarà gnenta i s’eri fina persüas.

T’ ho sempar vursü ben cume ‘n’ amisa
anca dess che ti t fè véd pü gnent dal tüt,
e se Nuara la to presensa la renda grisa
i rimpiangi cui mument anca se brüt.

Cume quand a dl’Alcarotti ti ‘scundevi San Gaudensi
e ti rivavi dal Valentino scavalcanda ‘l mür
e par véd un toch dla partida as faseva i penitensi
parchè a quatr’ uri dla bassura ti fasevi gni giò scür

Adess sensa da ti i giurnai in bèli e lüminusi,
anca se patissi un po’ la tò mancansa
che a füria da scargà in cel robi scarusi
da gris duarji sbianchì tüta la stansa.

L’è tantu temp che urmai s’ancuntruma mia
partend da Vèvar par rivà fin a Pernà.
un po’ da trüch un po’ da cipria e cusì sia,
t’ sè diventà ‘na sciura liganta e riservà,

E quand cul dì che prima o pö par tüti al rivarà
se ti vöri fam un regal cun grassia e curtesia,
vegna giò ancù ‘na volta sü la mè cità,
vegna giò ancura a fam un po’ da cumpagnia.

Nonnopipo

*scomparso nel nulla

Continua a leggere

Dialetto

I pagèli dl’influensa e dla sciatica

Published

on

I pagèli cun l’influensa e la sciatica grassie a SportItalia

 

Raspa  

Am da una man fasend un’ uscita che püssè gnuranta d’ insì as mora. Pö as riscata cun un’altra da inteligentòn

Bonaccorsi

L’ intervent püssè dificil a la fa quand da lateral al passa in mèss a sustitüì Benassi infurtünà.

Benassi

L’ intervent püssè dificil a la fa quand da central al passa in panchina quand l’è infurtünà

Agostinone

Anca se al g’ ha la grassia e la delicatessa d’una mietitrebbia, la so presensa in camp l’è indispensabila ‘mè al green pass par entrà int l’usteria

Paglino

Al so dirèt aversari l’ han purtà via cun l’ambulansa intrament che al vusava <Purtim via, luntan da cul lì cunt al trentadü sü la schena, i la vöri pü s-ciarà gnanca in cartulina>

Vaccari

Dopu la partida l’è ciapà al cestin dla merenda e g’ ha bütà dentar al gol. stasera cume premi g’ ha al permèss d’ andà a durmì a dés e mèsa che duman as deva andà a scola

Tentoni

Al giöga una partida da premi Nobel e cul recupero dla bala al vutantanövesim che al manda in gol al canibal Dardan, al merita l’espusission int la Galeria di Uffizi a Firense

Di Masi

Se al segna mia, almenu un assist da gol la fa sempar. Al tira al carèt cume al mülu dal Sciur Cichìn, e prima o pö un po’ da ripos a la merita.

Laaribi

Al merita un bèl vut in pagèla, sia parchè l’è stai bon da fa un fallo a giögh fèrmu, sia par la  petinadüra che la cataluga cume ambasciatur dl’ ignuransa cume agh piasa a nüm. Se pö i pensuma che Dardagnan al pretenda la so amunission quand agh va doss ris-ciand l’infurtüni, al diventa un idolo.

Vuthaj

Cun la so facina da sicàri dla mafia giapunesa, al sumena al terur in mèss dla difesa aversaria. Incö l’è penetrà in area püssè da quantu Selèn l’è stai penetrà in tüta la so carriera.

Gonzalez

Cume premi par la buna prestassion cuntra al Casal, la sucietà g’ ha cuncès al lündas da libertà

par andà a véd i cantier

 

Sustitüssion

Amoabeng   I prim dü passag i hin sbaglià, e cume al pulissa la bala cun la majèta prima da bat al fallo lateral a significa che l’è sü la stra buna par diventà vün di gnürant che i preferuma

Bortoletti  Al lavur püssè dur l’è infilà la fassa da capitàn

Capone  Al sustitüissa Paglino e al reclama parchè da cula part al trova al camp giüstà cume se a füssa passà la siloria.

Brucoli – Scariano  Benvegnü

Marchionni  I dü esterni dal centrucamp i fan un lavur dla Madona e i rüscan sensa alsà la testa. Buna l’idea dal Mister, cume cula da uffrìgh sübit un cuntrat par fa i pulissji a cà sua dò uri al dì, méi dopu l’alenament cusì i pulissan anca la docia.

Nonnopipo 

Continua a leggere

Dialetto

La paniscia … azzurra

Published

on

Tutti gli anni, con l’arrivo del primo freddo, quando la brina rende croccanti le verze, ho il piacere di riproporre queste rime.
La vegna ndi cassini e l’è un piatt dla povra gent,
l’è ‘l ricord d’una vita grama quand sül tavul gh’ era gnent.
E quand la nebbia, vèrs Nuembar, l’era grisa ‘mè la fam,
e un purscé, che tacá sü as trasfurmava in salam,
as capiva a la sveltina e sensa tèma da sbaglià,
che al temp da fa la paniscia finalment l’era rivá.
‘S cuminciava tri dí prima cun la versa giá brinà,
‘s bütava dentar i fasö, un po’ intér un po’ schiscià,
‘s faseva búi un po’ da cuji, un toch d’oss bel divussius,
e al brod, dasiot dasiot, al cuminciava a gni mustùs.
Un para d’uri i bastavan mia, agh na vüreva cinq o sés,
e se gh’ era mia temp…as saràva un öcc….va ben l’istéss!
Pö ‘s ciapava un bel cudrö che s’ üsava fai da ram,
e ‘s tirava fó dla duja ‘na fidighina e un bel salam.
Sül tajér* as pistava al lard e fina ‘s triava ‘na carota,
un po’ ‘d sèlar, una scigula fin a quand ‘l cüdrö a scota,
Quand al büter a sfrigulava e al ris l’ era ben tustá,
s’ argiungeva ‘na buta ‘d Spana a föch alégar par sügá.
Pö l’era ura, finalment, da purtá a cutüra al ris,
sensa prèssa cun passiensa par mia fà di gran pastís.
Un quart d’ ura…vint minüt, trusá ben e cun curagg!
manca dess numà una roba: una gratada da furmagg!
Pö un tocch da cul bütér che ‘l fadiga a slenguà,
as trusava ben……sensa paüra, pö ‘s lassava ripusà.
Un öcc al tavul…l’è tüt a post…anca al vin al manca mia,
e ‘s mangiava la paniscia che a Nuara l’è puesia!
Uramai l’è un bott e mèss e a l’Alcarott giöga ‘l Nuara,
‘s branca in man la biciclèta a chi riva prima ‘s fa la gara,
Sará ‘l vin in abundansa e tri piatt da cul risòt
che sü i ass da legn dla cürva as finiva a fà a cassót.
Tüti bulà ‘mè i pumcudógn e sgarblà ‘mè ‘na saràca,
ma da vusà “forsa Nuara” la nostra vus l’ era mai straca
* licenza poetica
esatto sarebbe “pistalard”
Nonnopipo

Continua a leggere

Telegram

Facebook

Ultimi Articoli

Copyright © 2017 Zox News Theme. Theme by MVP Themes, powered by WordPress.

%d blogger hanno fatto clic su Mi Piace per questo: