Rimaniamo in contatto

Dialetto

Forsa Nuara tüta la vita

Published

on

L’ è da quand i son picinin che im rabati cunt al dialètt; prima par capí cus i disevan i grand e i vegg, dopu par pruá a parlal in modu e manera da fass capí. A scrival gh ha vursü un po püssè temp.
Par un bell tocch i accento sü la lettra e, la u cunt i dü puntin in scima, hinn a stai un turment.
Parchè, disumal tra da nün, al dialett l’è sempar a stai e sempar al sará una “simpatica brüta bestia” che ti sè mai finí da cunuss.
Un quai vün al disa, cun un po’ da süperbia, che al nostar dialett al riva dla visina Lumbardia e al mis-cia una quai parola piemuntesa; alura mi igh rispundi che nün nuares al minga lumbard e al parèi türinés la druvuma gnanca suta turtüra!!
Ecco, se propi duvuma truá una quai discendensa, alura son d’acordi cunt l’ avucat Giulio Carlo Genocchio, vün di püssè grand pueta nuares, quand al diseva che i rappresentuma una frangia dla civiltá ticinesa, indua al Tisin, dai muntagni dl’ Ossola, passand in mèss al Lagh Magiur, par rivà fina in Lumlina, l’è lassá una testimunianssa che suma stai bon da cultivá e rendla ünica e nostra.
Ecco, sa scapa mia!! Nün, cume ‘l nostar dialett, i suma nè lumbard nè piemuntes, i suma madumá e par furtüna Nuares.
E alura al dialett al diventa al metar par misurá quantu l’ è lunga la memoria.
Sensa la memoria as va mia luntan, e i nuares, pruincia cumpresa, gh’ hann una memoria d’elefant.
Ma dasiot dasiot anca Nuara la cambia sensa fass n’acorg e un tocch la volta la perda i só riferiment püssè impurtant: tüti cui post e cui robi che hin vist passà interi generassion.
Cume par esempi i Circul, riferiment di rion e ritrovo principal di frassion, cui che ‘dess o hin sará sü o hin cambiá la manera da véss düert.
I risturant che hin fai la storia gastronomica da Nuara cume al Caglieri e la Meridiana a Agugná sü l’ autostrá, l’usteria di Tri scalin, la Cá dl’ Emiliu a la Bicocca, al Toscano da via Dante, la Campagnola sül Curs Risurgiment, e chissá quanti altar!!!
Basta pensá a la paniscia, che tanti anni fa a Nuara gh’ era mia un böcc düert indua la cüsinavan mia, e dess cui dü o tri post indua ch’ hin bon da fala ancura, ognün la fa a la só manera, una quai vüna l’ è anca un po’ tropp fora di tradission.
Kebap e dla gran carnascia malsana, che i ciaman Hamburgher, hin pià ‘l só post.
A gh è pü gnanca la nebbia; l’è sparí cume i rundanin a primavera, cusí dess tüti i stagion in diventà vüna cume l’altra.
A resta i riséri uguali a cume i eran prima…uguali a prima vista, peró!!
Incö manca cui bistiulín che i cumpagnavan da nott al sògn cunt al só vèrs e che i diserbant in eliminá sensa lassan pü tracia. E cun lur hin sparí anca tüti cui prelibatèssi che cunt i rani cunfessiunavan di piatt da véss a stracüntá tantu eran bon:
fritá e rani, rani in ümid, rani ripieni e rani rustí…e una margherita da dü litar !!, che ti s’ eri mia cuntent fin a quand at mustrava mia ‘l cü.
Peró in mess a tüti sti ricord, che hin bon da fat gni al magón, agh n’ è vün che püssè di altar am fa bagná i öcc.
E l’è una murusa che l’è cumencià a fa perd la testa quand a Nuara la Cüpula l’era un quai ann che l’era stai finí!!
L’era al milanövcentevott quand nasseva al “NOVARA CALCIO 1908”.
E l’è ancura chí fresca e bèla ‘mè una rösa azzurra.

Nuara l’è una strà fudrà da sampietrin,
Nuara l’è un’usteria cun davanti tri scalin.

Nuara l’era nebbia e prufüm d’aria bagnà,
Nuara l’era un circul e i carti par giugà.

Nuara l’è una curt cunt i cai cun la ringhiera,
Nuara l’è un amis che ‘t cumpagna a ca la sera.

Nuara l’è una punta cun al Cristu su là in scima,
Nuara as cambia tütt, ma resta sempar cume prima.

Nuara l’è na cassina in mess a dü turent,
Nuara l’è ‘l dialett…un quai vün al capissa gnent.

Nuara l’è la ‘Lea in mess di sò bastion,
Nuara l’è speransa ma anche tradission.

Nuara l’è ‘l Monte Rosa piantá la giò sül sfund
Nuara la cumencia quand a cumencia al mund.

Nuara e San Gaudensi sará dentar al sò scürö,
Nuara ch’ la sàra la porta quand urmai hin scapá i bö.

Nuara che la rasuna però cun la sò testa…
Nuara che la parla una lengua urmai furesta.

Nuara e ‘l Camporelli e ‘l Vinticinch April,
Nuara che ‘l curagg g’ha fai imbrascià ‘l füsil.

Nuara partigiana, Nuara e la so storia,
Nuara dla liberassion, Nuara dla memoria.

Nuara l’è na rösa brinà a la matina,
Nuara una puesia che s’impara in surdina.

Nuara indua la piana a s’ingübissa un po’,
Nuara che da int l’aria la vöra mia gni giò.

Nuara a pé par tèra, Nuara calson rutt,
Nuara povra gent, Nuara bell’in biutt.

Nuara l’è un’ urchestra ch’ la suna una meludia,
Nuara al lubión dal Coccia che un erurr al perduna mia.

Nuara che una pizza la custava dusent ghei,
Nuara dal “kebap” e di cinés…ormai ghè quei..!!

Nuara di mundini par una brancà ‘d ris,
Nuara indüstrial, Nuara culur gris.

Nuara sempar svigia, Nuara risparmiusa,
Nuara facia smorta, Nuara laburiusa.

Nuara dla paniscia e dal salam dla duja,
Nuara dla casseöula che dzura al föch la buja.

Nuara dal “mulita” che ‘l rivava in bicicleta,
Nuara dal giasciarö e l giasc int la celèta.

Nuara dla grighèra da dicembar fin febbrar,
Nuara indua ‘l sul l’è mia dùls ma gnanca amar.

Nuara la cumincia ‘n tal milanövcentevott,
e drera a un balòn ‘s riva fin a l’Alcarott!!!

Nuara l’è un bell libar che ‘s legia già ‘d matina,
Nuara l’è un rigúr ch’as tira in cupertina.

Nuara l’è una maia, azzurra cunt la scüdett,
cruss bianca sü sfund russ impatacá sül pett.

Nuara la so gent…fai da povar e da sciur
la maia, la nostra maia..sempar bela cume un fiur.

Forsa Nuara tüta la vita

Novara perchè è la mia città, il Novara calcio perchè è la squadra della mia città, il dialetto perchè se il futuro è una porta il passato è la chiave per aprirla. Forsa Nuara tüta la vita.

Continua a leggere
Clicca per commentare

Lascia un commento

Dialetto

Ann növ, stèss Nuara!

Published

on

Un altr’ ann l’ è in viá ch’al finissa e cumencia un ann növ … 

… però, giüst par fa un po’ al sufistich e par mia passà da smorbi, sarissi cuntent anca d’ un ann da secunda man.

Si … insuma, mè ’s poda dì, ècu: vün da cui giá duvrá.

Un ann giamò ténc e liss cume i calson cört chi purtavan indoss una volta, un ann un po’ bulà e sgarblá ‘mè i ginöcc strüsà sü la tèra d’un campètt dal fulbar in periferia, un ann immarlatá  ‘mè la roda d’ una biciclèta ch’ l’è ‘pena passà in mès dla palta. Am piasarissa anca ch’ al pudissa véss lungh ‘mè i eran lungh i ani una volta, quand i finivan pü parchè is misürvan mia cüntand i dì che i passavan, ma guardand i stagiòn che cambiavan dasiòt dasiòt, sensa prèssa, mia ‘mè dèss che sa scunfundan tra da lur.

Am piasarissa un ann cun al giasc da dicembar fin genár e magari un toch da febrar,

cun i candilö tacà suta i grundón e i foss gelà da un giasc spèss quatar dit, indua as faseva scülgarola.

La primavera pulida e fresca, quand i rundanin, d’un ann a l’altar, ti a cunussevi vün par vün.

E pö un’ està cun i tempural a rump la calùra, intrament che i cuntadin guardavan cun la man tacá la frunt da quala diression muntava al négar e disevan : ” se ‘l tempural al vegna

dla muntagna, ciapa la sapa e va in campagna, ma se al munta sü 

dal Munfrá ciapa la sapa e scapa a cá” … un para d’uri e un mèss litar al circul

e pö i turnavan indré a finí la giurná, mia cume dess che un’ ura d’acqua la fa disastar.

Pö rivava l’ autün, duls ‘mè ‘ l must d’ üga pistá cunt i pè  e cunt i scussalin ligà dal fioch blö suta al barbarott, inissiava la scola … e anca al campiuná dal fulbar … dess inveci la prima partida la fann dré feragust, quand la gent l’è al mar e in muntagna… mah!!!!

E già ch’ i son tirà man al fulbar, i darissi un toch da vita par respirá ancura una volta l’ aria dl’ Alcarotti, l’aria d’ una partida dal campiuná dal mè Nuara … magari insèma i mè amis d’incö, e fass bagná sensa nacorgias dla nebia cume cula d’una volta, che tacá la rét dla cinta la diventava grighèra … ecco, vürarissi un ann cusí, cume cui che mai pü turneran indrera … un ann növ ma vécc … insuma, par mia fala lunga, un ann püssè giüst e unèst … indua chi l’è bianch ‘mè la fioca e chi l’ è negar cume i nivli, che hin in vià a purtà al tempural, i podan sta insèma dentar la stèss almanàch.

E pö un pensier i la dedichi a la mè squadra dal cör che par püssè d’ un sécul l’è traversà la vita d’una cità e dla sò pruvincia sensa mai cambià la facia, sempar lé, da quand l’è nassü fin rivà a un quai més fa, quand un brav om l’è decidü che tüti i sò tifus i avrian pudü andà ancura in gir a testa alta e cun la schéna dritta. Grassie Sciur Ferranti, giügastron d’un milanes, che ti sè vursü sumenà speransa e urgoli in cula tèra rigugliusa, che tri raspatéc, sensa anima nè vargogna, i hin stai bon da sügà cume gnanca al Tardubi di sti temp. Sti tranquil, prima o pö tüt av turnerà indré, brüta maniga da vigliacòn, che i si scapà in mès dla not da scundòn, cume cui cunìn che i curan parchè dréra gh han la vulp che la senta l’udùr dla vostra rassa carogna.  

E a la fin dla féra, im senti da ringrassià e fà tanti augüri a tüti cui tifùs che i mòlan mia d’un milìm, e che tüti i volti che giöga al Nuara i hin sempar present, e di volti anca luntan da Nuara, par fa si che al nostar cör al poda cuntinuà a batt par cula maja che l’è diventà nostra dopu che  suma rubà un toch da cul ciél che i nostar sògn i hin culurà d’azzurro. In fund l’è cambià gnenta. 

Forsa Nuara tüta la vita

Nonnopipo

Continua a leggere

Dialetto

Tanti augüri, Novara FC!!

Published

on

Suta un ciel ch’al sa da guèra da rassismo e suferensa

fasuma l’albero pö ‘l presepi in mèss un mar d’ indifferensa

 

sfularmà mè i can da cacia quand i nasan ben l’udùr

a ghè nissüna diferensa tra la belva e ‘l dumatùr

 

tüti dentar la stessa gabbia a lutà par tri dané 

sempar prunt a cambià la facia sensa mai vultàs indré

 

e i fiulìn ai cunfin dl’Europa dal frèd i moran ‘nt l’indiferensa

intrament che i discütuma in qual Paés dagh acugliensa

 

Purtuma indoss i stèss vistì cüsì cun al fil dl’ ignuransa

pö cercuma i fassulètt quand as piangia in abundansa

 

Però ‘dess a ghè ‘l Nadal e i suma tüti püssè bon,

e cul che püssè ‘dèss interessa l’è mangià mè di gurdiòn.

 

Tanti augüri a lü e famiglia, ch’ am salüda la so sciura!!!”

si, l’è cul ch’ al sta al quint pian, e la so dona l’è impustura

 

Quantu temp che it vedi mia, son cuntent da brasciàt sü “

A m’ha sempar stai süi bali, ma ch’al vaga a da via ‘l cü!!-

 

Suma fals ‘mè na bancunota dal valur da quindas euro,

e la sciarvèla in cunfüsión da ricuverala in Neuro!!

 

I püssè timurús da Diu i vann a messa a mèsanott,

ma pena fora dl’ üss dla gésa is ricordan pü na gott.

 

Pö van ca, pìcan la dona, una scarpá ‘n tal cü ai fiulín,

e cun la facia suridenta i düerdan i pachetìn.

 

Si la só ho fai una menda, “na got” la disan i milanes,

l’ho scrivü par al Sciur Ferranti, ch’ l’ è amis di nuares!!

 

Ma adèss l’è temp d’augüri, manca poch a la scadensa,

se im dismentighi un quai vün i pagaró la penitensa.

 

Bun Nadal a tütt al mund, bon Nadal al mè Nuara,

bun Nadal a cula maia che par nün l’è tantu cara.

 

Bun Nadal a l’ Alcarotti, grüp da storia e sentimént

bun Nadal ai mè amìs sensa da lur sarissi gnént

 

Bun Nadal al Sciur Ferranti al Marchionni e ai giügadur

dai tifus sti pür tranquil gh avrì indréra tantu amur

 

… ma una vuss putenta e forta sensa tropi resistensi

sü dla panscia la rampéga fin rivá a scavá i cusciensi.

 

Si l’ è véra, a Nadal a deva sempar vinc l’ amur

ma i podi mia smentigam da chi m’ ha fai pèrd l’unùr

 

Brüt Nadal a cui bastard che i hin pruvà a rubam un sogn

dla brüta rassa ‘mè vüaltar igh n’ uma mia da bisogn

 

I si rivà cun i pruclama e i si massà tüti cume in guèra

buriùs gnürant e disunèst da finì suta una mutèra

 

Sarìv sü bén in cula gabbia da duva vunc i si scapà

che Nuara e la sò gént i hin mai stai la vostra cà

 

Brüt Nadal a cula rümenta, giargianes sensa vargogna

turnì d’ ‘induva i sì rivà turnì a ca vostra o int una fogna

 

E dopu avé tucà al fund i alsi i öcc e guardi avanti,

bun Nadal al növ Nuara, bun Nadal a tüti quanti.

 

E quand la riva mèsanot e ‘nt la stala al Gesü Bambìn

ricurdiv che al Nonnopipo av fa i augüri e av da un basìn.

 

Forsa Nuara tüta la vita

 

Nonnopipo

Continua a leggere

Dialetto

Dasi dasi … la nostra maja

Published

on

Dulsa ‘me ‘na magiustra catá frèsca dla prösa

russa dla passion cume la deva véss ‘na rösa

 

bianca cume la fioca sü là in scima dla muntagna

rigugliusa cume la tèra generusa dla campagna

 

svigia mè un rundanin ch’al riva prèstu a primavera

sincera ‘mè ‘na preghiera recità quand vegna sera

 

una maja culurà cun la passiòn d’ un amúr etèrnu

tantu fort sincér e unèst ‘mè ‘l deva vés un lungh invernu

 

una maja che la parla al dialèt dla sò Nuara

fai da nèbia da risèri generusa e mai avara

 

granda e grossa e maestusa ‘mè la cüpula ‘d San Gavdensi

garbà e rispètusa ma sensa tanti riverensi

 

cunt al stadio tra via Sutil al Valentin e via Alcarott

e ‘l Campurèl ‘nt al Muntriö ch’al fa sü i so biscott

 

mia lumbarda ma a vuré ved forsi gnanca piemuntesa

ben vistì e urgugliusa da véss ‘na spusa nuaresa

 

riservà cume la nebbia silensiusa dla matina

d’ora e lüsenta ardimentusa ‘mè ‘l Salvatur sü lá in scima

 

‘rumatica e prufümà ‘mè ‘l cafè dal Balussín

sghèlma precísa e forta cume un pügn dal Sguaitín

 

savrí e prufümà mè ‘n sarachín pucià ‘nt la sal

giuiusa e alégra ‘mè ‘na maschera da carneval

 

benaugüranta cume béf in cumpagnia ‘l bicér dla stafa

piena d’amúr e amicissia cume da vin una carafa

 

rissulina e scaprissià ‘mè ‘na fiulèta malissiusa  

minüdria e legera cume una müsica armuniusa

 

una maja che a testa alta la porta in gir un sentiment

cumpagnà da gént unèsta e un Sciur da Presidént

 

una maja ch’ la sarà l’ urgoli da Nuara e la so pruvincia

da sentìla tacà al cör quand la perda paregia o vincia

 

‘dèss im rivolgi ai giügadur e la fò a la mè manéra

prima da mètt indoss la Maja pruvì a légg ‘sta preghiera.

 

Amate la vostra società 

e la maglia che portate 

difendetela

siate dei generosi in campo 

la gente vi applaudirà sempre

(Silvio Piola)

 

Nonnopipo

Continua a leggere

Telegram

Facebook

Ultimi Articoli

Copyright © 2017 Zox News Theme. Theme by MVP Themes, powered by WordPress.

%d blogger hanno fatto clic su Mi Piace per questo: